Tasiilami ajornartorsiutit nutaamik eqqarsarluni aaqqiissutissarsiniarneqassapput

Tamannalu Tasiilamit nuannaarutigineqarpoq.

- Inuuniarnikkut ajornartorsiuteqartut ikiorneqarnissamik pisariaqartitseqaat. Meerarpassuit ullukkut unnuakkullu paaqqinnittarfinnut angajoqqaarsianullu inissinneqartarput. Tasiilamiilu meeqqat pitsaanerujussuarmik perusuppagut, Tasiilami atugarissaarnissamut ingerlatsivimmi siunnersortaaneq, Kurt Pedersen oqarpoq.

Aamma atuaruk VIDEO Tasiilami meeqqat inuuniarnikkut ajornartorsiortorpassuit ikiorniarneqalerput

Oqartussalli suleqatigiinnerminni suna sulissutiginiarneraat suli nalunarpoq.

- Suliniutinik tigussaasunik suli pilersitsisoqanngilaq. Suleqatigiinnerput aatsaat aallarteqqammerpoq, Kommuneqarfik Sermersuumi meeqqanut, ilaqutariinnut atuarfeqarnermullu ingerlatsivimmi pisortaq, Søren Valbak oqarpoq.

Oqartussalli suleqatigiillutik suliniuteqarnialernerat, Tasiilami Alivarpiup pisortaata Lars Formsgaardip nuannaarutigaa.

Inuuniarnikkulli ajornartorsiutit siornatigornit ikinnerulersimasut, taanna isumaqarpoq, namminnerlu kajumissutsiminnik sulisut ajornartorsiutit ikileriarsimanerannut pissutaanerarlugit.

Taakkuli aamma ikiorneqartariaqarput.

- Assersuutigalugu atuartoqarpoq inuuniarnikkut ajornartorsiutitik pissutigalugit persuttaasartunik. suliassat taamattut suliarisariaqartarpagut, naak suliassamut ilinniarnikuunngikkaluarluta, Lars Formsgaard oqarpoq, ilanngullugulu oqarluni tarnip pissusaanik ilisimasallit, ilinniartitsisut isumaginninnermullu siunnersortit amigaatigineqartut.  

Aamma atuaruk Meeqqat illersuisuat Tasiilamit ikioqqusunik saaffigineqartarpoq

Illoqarfimmilu ilinniagaqarsimasunik sulilersitsinissaq kommunimit sulissutiginiarneqarpoq.

Misilittakkalli naapertorlugit ilinniarsimasut Tasiilamut sulilersinnissaat unammillernarpoq, sulilertullu sivisunngitsumik illoqarfimmiittartut, Søren Valbakip oqaatigaa.

Taamaammat Tasiilami najugaqareersut ilinniartinneqarnissaat taassuma ujartorpaa.

- Tamatuma iluatsinnissaa upperineruvara. Taamaammat tappavunga ilinniarnissamik neqeroorutissamik pilersitsisoqarnissaanik pisortaqarfimmut siunnersuutiginiarpara. Taamaalilluni tappavani najugaqartut ilaat najugartik qimannagu ilinniarsinnaassapput illoqarfimmilu sulilerlutik, Søren Valbak oqarpoq.

Aamma atuaruk Tasiilami meeqqat affaat atugarliortuupput

Taassumali ilinniagallit illoqarfimmut anginermut nuussinnaanissaat eqqumaffigaa.

- Ilinniarsimasut illoqarfimmi pituttorsimaannavissinnaanngikkigut nalunngilara. Illoqarfimmili najugaqartunik ilinniagaqalersitsinikkut patajaannerusumik iluarsiissuteqarsinnaavugut, Kommuneqarfik Sermersuumi meeqqanut, ilaqutariinnut atuarfeqarnermullu ingerlatsivimmi pisortaq, Søren Valbak oqarpoq.