VIDEO Tasiilami meeqqat inuuniarnikkut ajornartorsiortorpassuit ikiorniarneqalerput
![](/sites/default/files/styles/image_934x467/public/oembed_thumbnails/2022-12/-wMUtQljOgUdUwLAnVEdrUl6Wn9KQ9claamYS4krV_k.jpg?itok=QuyJrSXN)
Meeraanermi inuusuttuaraanermilu inuuniarnikkut ajornartorsiuteqarsimasoq Qanoruumiit siornatigut Tasiilamiinnitsinni naapipparput.
Peroriartornermilu angajoqqaarsiat qulit tungaanut nuttarfigisimagaanni, atugarissaarsimananilu imaaliallaannaq qaangiisinnaasimanngilaq. Imigassamik ikiaroornartumillu atuinerit allarpassuillu aqqusaareerlugit peqqinnarnerusumik inuuneqalersimasoq Mikael Christensen naapipparput.
Sumiginnagaasimanerlu assigiinngitsutigut ingerlaannartumik sunniuteqarnerluppoq.
- Sumiginnangaanikooqaanga. Unnuaannarmi aneertarnikooqaanga, meeraagama angerlarfissaaleqillunga.
Aamma atuaruk Meeqqat illersuisuat Tasiilamit ikioqqusunik saaffigineqartarpoq
Angajoqqaarsiarisarsimasamimi ilaannit sumiginnangaanermi kingorna aamma kommunemit sumiginnarneqarsimavoq.
- Taamani social tappissimanngillat misigisannut, qujanartumilli tappinnerulernikuupput.
Sumiginnagaanerlu arlalitsigut kinguneqarpoq.
- Aqqaneq marluk missaanni ukioqarlunga inuunera ajortorujussuunikuuvoq. Allaat aserorterisarnikuullunga Tasiilami illoqarfiup iluani. Taava aamma 20-t 25-t missaani ukioqarama inoqatinnut qaasunnikorujussuuvunga. Naluara suna peqqutaanersoq.
Ikiaroornartumillu aamma imigassamik atuineq meerartaareernermi kingorna ingerlatiinnarpaa. Tamannali allanngortinniarlugu nulianilu ukiut marluk pingasut matuma siorna iliuuseqarput peqqissimissutiginngisaminnik.
- Massakkut piniartuuvunga, turistilerisarpunga, pinngortitaq angalaartuaannarpara. Qitornakka nuannaaqatigisaqaakka. Inuuneq maanna pilluarnaqaaq.
Aamma atuaruk Tasiilami meeqqat affaat atugarliortuupput
Allamimmi aqqutissaarussimavoq.
- Maligassiuisussaagama, qitornamma malinniassappanga.
Tasiilamili meeqqanik sumiginnaaneq annertooq maanna suli ajornartorsiutaavoq. Mikaelillu sumiginnagaaneq kingunerilu misigisareeramigit kommunep sullissilluarnerulernissaa suli pisariaqarsoraa.
Poul Hansen, Demokraatit, Kommuneqarfik Sermersuumi isumaginninnermi ataatsimiititaliami siulittaasoq tamanna pillugu apersorneqarnera videomi takuuk.