Tasiilami aalisakkerivittaassaq sapaatiuppat kiisami niviariaqqaarfiussasoq

Tasiilami innuttaasut suliffissanik amerlanernik kissaateqarlutik ukiorpassuarni nilliaatiginninnerat arajutsisimagaanni tusilangaatsiartariaqarpoq.  

Kissaataallu tusaaneqalaarsimagunarpoq.

Tasiilamimi aalisakkanik tunitsivissaq sapaatiuppat niviariaqqaarfigineqassaaq. Royal Greenlandip aalisakkerivittaassaa aasaru ammassasoq ilimagineqarpoq.   

Aalisakkerivik inuit arfineq-marluk tungaanut suliffissaqartitsissasoq Aalisarnermut Piniarnermullu Naalakkersuisoqarfiup siorna juunimi nalunaarutigaa. Aalisakkerivimmili suliassat apeqqutaassammata inuit qassit sulisorissangatinneqarnersut Royal Greenlandip KNR-imut paasissutissiissutigisinnaanagu nalunaarpoq.

Sulisorilerneqartussat amerlasoorsuunngikkaluartut illoqarfimmut pingaaruteqassaqisoq Kommuneqarfik Sermersuumi borgmesterimut tullersortit siulliat maanna Tasiilami najugalik, Justus Hansen oqarpoq.

- Sulisussat arfineq-marluk amerlagisassaagunanngillat, iluaqutaassaarli. Aningaasarsiornerulerneq illoqarfiup pisariaqatilluinnagaa piviusunngussaaq. Taamaammat isumalluarpunga, taanna oqarpoq.        

Tasiilami suliffissaaleqisoqarnerusoq

Tasiilami nunaqarfiinilu sulisinnaasut 15 procentii decembari 2023-mi suliffissarsiortut Naatsorsueqqissaartarfiup kisitsisaatasa takutippaat. Tassa 150-it suliffissarsiortuullutik.

Nuna tamakkerlugu piffissami tassani suliffissarsiortut 1400-juupput.

Tasiilami inuusuttut 25-t tungaanut ukiullit aamma 50-t sinnerlugit ukiullit suliffissaaleqisuni amerlanerpaapput.

Illoqarfimmi aalisakkerivittaassaq aalisarnerinnarmut sulisussanullu iluaqutaaginnarani sanasunut suliffinnullu sullissisunut aamma suliffissaqartitsissasoq Justus Hansen oqarpoq.

- Tasiilami suliffeqarfiit ingerlalluareersut suliassaqarnerulissapput. Pingaartumik sullissinermik suliaqartunut iluaqutaassaqaaq. Taamaammat suliffissaaqisut ikilinissaat qularutiginngilara.

Tunumi aalisakkanik tunitsiveqarneq maanna unammilleqatigiiffiunngilaq. Tunitsiviusinnaasutuarmi islandimiut suliffeqarfiutaat Arctic Prime Fisheries Kuummiiniippoq.

Aalisartut 64-it pisatik tamaasa Kuummiini 2022-mi tunisimagaat naalakkersuisut Tunumi aalisarnerup ineriartortinnissaanut pilersaarutaanni 2023-2030-mi allaqqavoq.

Tunumilu nutaamik tunitsiviusinnaasoqalerpat unammilleqatigiittoqalissasoq Justus Hansen isumaqarpoq. Kummiiniimmi Tasiilamut 50 kilometerisut isorartutigaaq.

- Tunitsiviusinnaasut aapperneqarpata iluanaaruteqarfiunerusinnaanngussaaq. Taamaammat aningaasarsiorneq suliassaqarnerlu pitsaaneruliinnassapput.  

Aalisakkerivittaarniarneq imaannaanngitsoq

Naalakkersuisut Tunumi saarullinnik suluppaakkanillu siorna upernaakkut pisassiinerisigut aalisakkeriviliornissaq periarfissaalerpoq.   

Pisassiisinermummi atatillugu suliffeqarfik pissarsisussaq Tasiilami aalisakkeriviliussasoq aamma piumasaqaataavoq. Suliffeqarfiit arfineq-pingasut qinnuteqartut akornanni Royal Greenland toqqarneqarpoq.

Aalisakkeriviliornissaraluit arlaqaqisut piviusunngunngitsooreersullu aalisakkeriviliortoqartussanngorpoq.

Tasiilamimi aalisakkerivissarsuaq 200-300 millionit koruuninik nalilik pilersaarusiorneqartoq KNR-imi 2010-ikkut qiteqqunneranni ilaatigut atuarneqarsinnaavoq. Fabrikki avaleraasartuunik Tunumi taamani amerliartuinnartunik aalisakkeriviulissasoq isumaavoq.

Hansinnguaq Mathiassen nunatsinnit, Tuluit Nunaannit Savalimmiuniillu aningaasaliisoqarluni taamani isumassarsisuuvoq.

Tasiilami aalisakkerivittaassaq 2017-mi piareertussaq pilersaarusiorneqartoq Sermitsiaq.AG-p 2015-mi ukiakkut allaaseraa. Aningaasaliisussallu tassaallutik Polar Seafood, Royal Greenland aamma tuluit aalisakkerinermik suliffeqarfissuat J. Marr. Aalisakkeriviliorniarnerli aamma piviusunngunngitsoorpoq.

Maannali qulakkeerneqarpoq.

Tasiilami nalunaaqutaq 13.00 nivariaqqaarnissamut peqataarusuttut tamarmik tikilluaqqusaasut Royal Greenland nalunaarpoq, naalakkersuisullu siulittaasuat Múte B. Egede (IA) peqataassaaq.

Royal Greenlandip siulersuisuini siulittaasoq Maliina Abelsen aamma Kommuneqarfik Sermersuumi borgmesterimut tullersortit siulliat Tasiilamilu najugalik Justus Hansen (D) aamma peqataassapput.

Katersortarfimmittaaq nal. marluniit tallimat tungaanut kaffillernissamut kikkut tamarmik tikilluaqquneqartut Royal Greenland KNR-imut nalunaarpoq.