Tartupaluk akerleriissutaajunnaarpoq

Danskit Canadamiullu erfalasutik Nunatta Canadallu akornanniittumut qeqertaaqqamut Tartupalummut 1970-ikkunniilli amujartortalersimavaat arlamillu erfalasui amusinerminni peertarsimallugit, qeqertaaqqamik kikkut piginnittuunerat takutinniarlugu.

Tartupaluup taamanerniilli taamatut akerleriissutaanera maanna kiisami unippoq. Aviisi Berlingske taama allaaserinnippoq.

Canadamiullu tusagassiorfiat Globe and Mail allappoq danskit Canadamiullu Tartupaluk pillugu isumaqatigiissutertik nutaaq pisortatigoortumik juunip 14-anni saqqummiuttussanngoraat.

Isumaqatigiissut malillugu danskit Canadamiullu Tartupaluk qiterpiaatigut titarsimavaat, affaa Nunatsinnut affaalu Akilinermi Nunavummut atasussanngorlugu.

AAMMA ATUARUK Danmarkip Canadallu Tartupaluup aaqqiagiinngissutaanera aaqqiissuteqaqatigiiffiginiaraat

Danmarkimi nunanut allanut ministereqarfik Tartupalummut tunngatillugu suli oqaaseqarumanngikkallarpoq.

Tartupaluup akerleriissutaanera Nunatsinni Akilinermilu naggueqatigiinnut Inunnut, piniarnerminni Tartupalummik tikitsisartunut imatut sunniuteqangaarsimanngikkaluartoq

qeqertaaqqap akerleriissutaajunnaarnera Nunavumm Inuit pisinnaatitaaffiinik isumaqatigiissutinillu suliaqarfiusup Nunavut Tunngavik Incorporated-ip, præsidentiata Aluki Kotierkip nuannaarutigaa.

- Tartupaluup sorlermut atanera Inuit akornanni ajornartorsiutaasimanngikkaluartoq danskit kalaallillu killeqarfeqarnikkut akerleriissuteqarnermi alloriarnerat nuannaarutissaavoq, Aluki Kotierk Globe and Mailimi taama issuarneqarpoq.

Tarpaluk pillugu isumaqatigiinniarnerit nutaat 2018-imi aallartinneqarmata suleqatigiissitamik iluarsiiniuteqartussamik pilersitsisoqarpoq, Tartupalummik piginnittuuneq sumiiffimmi aatsitassarsiortoqarsinnaaneranut Issittullu imartaata sikuisatsikkaluttuinnarneratigut imaatigut angallannermut isumalipilussuummat.

- Aaqqiissuteqarnissamut tamatta piareersimavugut. Piumassuseqarluartut katersuutsereerpavut sikullu qaatigut aallariaannanngorluta, danskit nunanut allanut ministererisimasaat Anders Samuelsen TV2-mut taama oqarpoq.