VIDEO Tamat oqartussaanerat akeqarpoq Qaasuitsulli Kommunia akiliisimanngilaq

Tamat oqartussaanerat aningaasanik akeqartoq Qaasuitsup Kommuniani borgmesterip, Ole Dorphip, Qulaarpaami oqallinnermi naqissuserpaa. Taammaattorli tamat oqartussaanerat nukittorsarniarlugu kommunerujussuaq aningaasaliisimanngilaq. 

Ole Dorphip oqaatigaa innuttaasut kommunip avinnissaanik kissaateqarnerat avaqqunneqarsinnaanngitsoq tamannalu akeqassasoq, tassamigooq tamat oqartussaanerat akeqarmat. Kommunilli siusinnerusukkut innuttaasut qanimut oqartussaaqataanerat piffinni siunnersuisoqatigiinnik pilersitsinikkut qulakkeersimasinnaagaluarpaat.

Kommunip innersuussut malinngikkaa

Kommunerujussuit pilersinneqarmata KANOKUKA-mit innersuutigineqarsimavoq illoqarfinni kommuneqarfiusimasuni siunnersuisoqatigiinnik kommunalbestyrelsinut siunnersuisartussanik pilersitsisoqassasoq, innuttaasummigooq oqartussaaqataanerat taamaaliornikkut nukittunerussammat. 

Innersuussulli tamanna Qaasuitsup Kommuniata malissinnaasimanngilaa. 

- Qaasuitsup Kommuniani sumiiffinni siunnersuisoqatigeeqarneq atulersinnikuunngilarput. Tamanna piviusunngortingajannikuugaluarparput aningaasalli allanut pingaarnerusorisatsinnut atortariaqarnikuuagut, Ole Dorph oqarpoq.

Siunissami tamat oqartussaaqataanerat qulakkeerniarlugu kommunit piffinni isumalioqatigiissitanik pilersitsinisamik pisussaaffilerneqassasut, Ole Dorph isumaqarpoq. 

Kommunimi oqartussaaqataaneq nukittunerusoq

Kommuneqarfik Sermersuumi innuttaasut oqartussaaqataanerat qulakkeerniarlugu unammillernarsimavoq, taamaattorli misissuinerit takutippaat kommunimi innuttaasut naammagisimaarinninnerusut. Uanilu Kommuneqarfik Sermersuumi bormesteri Asii Chemnitz Narupip qanoq iliorsimanertik oqaluttuaraa.