Takornariat imigassaarutit amerlisikkaat
Nunatsinnut siorna takornariartut aatsaat taama amerlatigisut nalunaarsorneqarput. Nunatsinni akunnittarfiit ulappupput, Ilulissani Hotel Arcticimi taamani aamma ulapputtoqarsimaqaaq, immiaaqqanimmi vininillu aatsaat taama tunisaqartigipput.
AAMMA ATUARUK Imigassartornerulersimasugut
- Siorna aasakkut unnuisut, siornaamut sanilliukkaanni, 6000-inik amerlanerupput, Hotel Arcticimi saqisuuneq Marie Stenshøj oqarpoq.
Hotel Arcticimit aaqqissuussat, soorlu assersuutigalugit tusarnaartitsinerit ataatsimiitsitsinerillu aamma tunisaqarfiulluartut, akunnittarfik paasissutissiivoq.
Nunatta karsianut 11 millionit koruunit
Akunnittarfimmi unnuisut siorna ukiup siulianut sanilliullugu 15 procentinik amerlanerupput.
Imigassallu aalakoornartullit tunisat 11 procentinik amerlanerupput.
AAMMA ATUARUK Nunatsinnut takornariat amerliartortut
- Amerikameersut Schweizimeersullu vinisinerusut, Ruslandimeersut Asiameersuunerusullu imigassamik kimittuumik aalakoornartortalissinerullutik, saqisuuneq oqarpoq.
Imigassaq Nunatsinnut siorna eqqunneqartoq tunisassiarineqartorlu 20 tusind literinik ukiup siulianut sanilliullugu angineruvoq. Taakkunaniillutik immiaaqqat kimittuut eqqunneqartut tunisassiarineqartullu 96 procentinik qaffariaateqartut.
Nunatta Karsia taamaasilluni isertitaqarneruvoq. Taakkua 11 millionit koruuninik ilallutik 196 millionit koruuniupput.
Takornariaqarneruneq illoqarfimmut pitsaasoq
Hotel Arcticimiilli saqisuunerup erseqqissaatigaa akunnittarfiup imigassanik tunisaqarneruneranik takornariat pissutaanerpaasut.
- Illoqarfimmiut isertorisartakkagut imigassanik pisinerunersut malugisaqanngilanga, Marie Stenshøj oqarpoq, takornariallu amerlanerunerat nuannaarutigaa:
AAMMA ATUARUK Takornariat tikittartut amerleriaateqartut
- Tamanna uagutsinnut illoqarfimmullu pitsaalluinnartutut isigaara.
Aamma Nuuk Imermi immiaaqqat maqitat ikiliartorsimagaluartut, 2016-imi amerliartorsimasut, Nuuk Imermi pisortap Bernhardt Christensen KNR-imut paasissutissiissutigaa.
Nunalu tamaat qanoq tunisaqartigisimanerlutik, pisortap oqaatigisinnaanngilaa.
