Umiarsuaatileqatigiiffiit aningaasartuutinit artukkerneqarput
Takornariartaatit anginerit sinneqartooruteqanngitsoortalissapput takornariartaatillu anngajaat aningaasartuuteqarnerujussuussalissallutik.
Aningaasartuuteqarnerulernerup malitsigisaannik takornariartaatit mikinerit imaatigut sillimaniartarnerat ajorseriassasoq, Nunatsinni Blue Waterip allaffeqarfiani pisortaq ilimasuppoq.
700.000 koruuninik akiliisassasut
Ilisimaneqalereersutut takornariartaatit talinnerminni akitsuutaat Naalakkersuisunit apparneqarpoq. Appaanerli takornariartaatinut malunniutaassanngilaq. Takornariartaassuimmi, soorlu umiarsuit 2.050-inik ilaasoqartartutut Aida Divatut ittut, Qaqortumukassagaangamik 700.000 koruuninik akileeqqaarlutik ilisimasortaqarsinnaapput.
Ilisimasortaqartarnissaq ima aaqqissugaavoq:
Takornariartaat Nunarput tikitsinnagu ilisimasortamik ikisoqassaaq, assersuutigalugu Canadamiit. Nunarpullu aqqusaarneqareerpat ilisimasortaq uniffissap tulliani niulluni. Taamaammat ilisimasortaqarneq sivisullunilu akisussaqaaq.
Paasissutissat
Aida Diva 2.050-inik ilaasoqarluni Qaqortumut tikeraaraangami Nunatta karsianut 1 million koruuninik akiliisaraluarpoq. Usitussuseqarnikkut 76.000 koruuninik maanna akiliisarpoq.
Taassumalu saniatigut ilisimasortaqarnikkut 682.000 koruuninik Greenland Pilot Servicemut aningaasartuuteqartarpoq. Ilanngaatit peereerlugit 317.000 koruuninik sipaartassaaq.
Amadea 594-inik ilaasoqarluni 310.000 koruuninik akiliisaraluarpoq. Usitussuseqarnikkut 350.000 koruuninik maanna akiliisarpoq, taassumallu saniatigut ilisimasortaqarnikkut 495.000 koruuninik aningaasartuuteqartarluni. Ilanngaatit peernagit 630.000 koruuninik aningaasartuuteqarnerusalissaaq.
- Aningaasartuutigineqartussat akunnaallisarlugit 750.000 koruuniussapput. Ilisimasortat marluusartussaapput, taakkulu ullup aappaata affaaniit ullut marluk sulisassallutik, Blue Waterip Nunatsinni pisortaa Jesper Øraker oqarpoq.
Aamma atuaruk Takornariartaatit akiliinerusalissapput
Ilisimasortat suliakittartussaagaluarlutik sooq taama akisutigineri, umiarsuaatileqatigiiffinnut qanoq nassuiassanerlugu pisortap ajornakusoortippaa.
- Ingammik takornariartaassuit ukiorpassuarni Nunatsinnukartarsimasuutillugit, umiarsuullu naalagaa aquttualu angalaffigisartakkaminnut misilittagaqarlualersuutillugit.
Umiarsuit anngajaat eqqorneqartut
Takornariartaatit anngajaat ilisimasortaqarnikkut aningaasartuuteqarnerpaasassapput, talinnerminnilu akitsuutit appartussaagaluit maluginngitsoortassalugit. Ilisimasortaqarnermut aningaasartuut nutaaq aningaasartuutigineqareersut qaavisigut aningaasartuutaassaaq.
Tassalu umiarsuaatileqatigiinnut qaavatigut aningaasartuutaassaaq, ilaasuminnut akiligassanngortittariaqarsinnaasaat.
- Umiarsuaatileqatigiiffiup ilaasumit ataasiinnarmit sinneqartoorutai ikittuararsuusut oqaatigisariaqarpoq. Taamaammat umiarsuaq 900-innarnik ilaasulik 400.000 koruuninik akiliisassappat akiliutai amerlassaqaat.
Takornariartaatit mikinerit, 250-init ikinnerusunik ilaasoqartartut, ilisimasortaqarnissamik piumaffigineqanngillat.
Aamma atuaruk Umiarsuit takornariartaatit aatsaat taama amerlatigisut
Greenland Pilot Servicesimilli akigitinneqartut qaffasimmata imaatigut sillimaniarneq takornariartaateeqqanut ajorseriassasoq, Jesper Ørakerip ernummatigaa. Issittumimi angalanissaminnut misilittagakillutik ilisimasortaqarniaraangamik, taakkununnga akisoorujussuusassaaq.
- Akit nutaat pissutaallutik takornariartaateeqqat ilisimasortaqarnissartik ajoraluartumik sussaaginnartalerpaat. Imaatigut sillimaniarnerup pitsaanerulernissaa siunertaagaluartoq killormuinnaq ingerlalissangatipparput.
