Takornariartaatinut maleruaqqusat sukannernerulernissaannik oqarneq politikerit arlallit taperseraat

Takornariartaatit nunatta sortaani angalasinnaanerannut naalakkersuisoq, ataatsimiititaliami siulittaasoq aamma illuatungiliuttut inatsisiliortoqartariaqarsoraat.

Allattoq Thor Bill, Jaaku Lyberth

septembarip 15-at 2023 16:33

Nutserisoq Najâraq Egede

Takornariartaat Ocean Explorer Tunumi kangerluit ilaanni Alpefjordenimi immap naqqani marraannaasumi ulluni pingasuni maggusimareerluni, ippassaq kaanngarmat angallatitaa issimasullu ajoqusersimarpasinngitsut paasinarsivoq.

Pisorli ajornerusorujussuusimasinnaagaluarpoq. Tamannalu tunngavigalugu politikerit maleruaqqusanik sukannernerulersitsiniarput. Maleruaqqusat takornariartaaterpassuit ukiut tamaasa nunatta imartaanukartartunut atuutissapput.

Nunanut allanut, inuussutissarsiornermut niuernermullu naalakkersuisoq Vivian Motzfeldt (S), oqarpoq "aappagumiit inatsisitigut malittarisassatigullu sukatikkanik, ersarissunik avaqqutaarneqarsinnaanngitsunillu malittarisassaqartittariaqarigut”. Taama oqarnera aalisarnermut piniarnermullu naalakkersuisumit Karl Tobiassenimit, ullumi taperserneqarpoq.

Pisut naatsumik

Takornariartaat Ocean Explorer Tunup Avannaani nunami eqqissisimatitami ataasinngornermi septembarip aqqarnani ikkarlippoq.

Issimasut 206-iupput. Ajoqusertoqaanngillat.

Umiarsuaq ippassaq kaanngartinneqarpoq. Maanna ajoqusersimanersoq paasiniarlugu anginerusumut umiarsualivissikkiartorpoq.

Ilaasullu timmisartorlutik angerlassapput.

Takornariartaatit nunatta kangerluini killeqanngitsumik angalasinnaapput. Akuersissummik peqarunik. Nunamiinnissaallli akuersissummut ilanngilaq, taamaattumik nunat eqqissisimatitat tikissagunikkit imartaaniiginnarsinnaatitaapput – Tunulli Avannaani nunap allanngutsaaliukkap imartaa tikissagunikku ilisimasassarsiortutulli immikkut akuersissummik namminersorlutik oqartussanit pisimasariaqarput. Takornariartaatinut piumasaqaammut tunngatillugu taamaasilluni imartani annaassiniartoqalissagaluarpat imaluunniit napparsimasumik angallassisoqartariaqalissappat sillimmat angalatitseqatigiiffinnit pigineqariissaaq.

Allisiguk

- Taama avinngarusimatigisumiittut imaalitsiaannaq tikinneqarsinnaannngitsut – ernumanarpoq inuit navialissappata aamma immap assinganik sanaartortoqarsimannginnerani sumut tamanut angalasut taakku ernumanermik annertuumik pilersitsivoq taamaammat naatsorsuutigineqassaaq sumiiffiit annertungaatsiartut takornariartaassuarnik tikiffigineqartannginnissaanik aalajangiivigineqarnissaa, oqarpoq.

Karl Tobiassen piniartunik – takornariartaassuit piniariartarfimminni angalasarnerannik killilersuisalernissamik kissaataat pillugu – oqaloqateqariartorluni Qaanaameeqqammerpoq.

Ajutoortoqaraluarpammi

Mariane Paviasen (IA) Inatsisartuni Eqqissisimatitsinermut Avatangiisinullu Ataatsimiititaliaani ilaasortaavoq. Takornariartaatip Ocean Explorerip ikkarlinnera erngumalersitsivoq. Pingaartumik eqqarsaatigigaanni taamaattumik pisoqariaannaaneraník siornatigut eqqoriaasimaneq. Taamaammat maleruaqqusanik sukaterinissamik oqarneq taperserpaa.

- Umiarsuit takornariartaatit piniariartarfinnukaraangamik mingutitsisarput. Assersuutigalugu takornariarparujussuit Narsarmut tikittarput. Narsami innuttaasunit amerlanerussuit. Taakkua tikikkaangata ataqatigiisaarisoqarneq ajorpoq takornariartisisartullu takornariarpassuit tamakkiisumik sullissinnaanngilaat, amerlasangaarmata.

Naalakkersuisut inatsisinik takornariartitsisunut atuuttussanik suliaqarnialernerat tusarlugu taamaammat nuannaarpoq.

- Imaannaanngitsumik pisoqaraluarpat umiarsuarlu avinngarusimasorujussuarmiilluni takorlooruminaappoq maanngaanit qanoq iliortoqarsinnaaneq, taamaattumik pissusissamisoorpoq sukannernerusumik inatsiliortoqarnissaa, Mariane Paviasen oqarpoq.

Aamma atuaruk Ocean Explorer: Takornariartaatip assingi videoliallu takukkit

Mariane Paviasen aamma Nunat Avannarliit Siunnersuisoqatigiivini ilaasortaavoq, ataatsimiinnermik ilaanni takornariartaatit angalasut amerlinerisa ajornartorsiutaanerat aamma oqallissutigineqarsimavoq. Eqqartugaannut ilaasimalluni Nunani Avannarlernut tamarmut atuuttussamik politikkiliornissaq, oqarpoq.

Maleruaqqusat sukannernerit, kisianni umiarsuit ikilinagit

Takornariartaatit amerliartuinnartut siunissaq eqqarsaatigalugu sukannernerusumik maleruaqqusaliuunissaannik oqarneq illuatungiliuttut aamma taperserpaat. Demokraatit siulittaasuat Jens-Frederik Nielsen, isumaqarpoq, nunatta takornariartaatit tikittartut sulerisarnersut inatsisiliornikkut nakkutiginerusinnaanngussagai.

- Isumaqarpunga taanna eqqartorluartariaqaripput, sukaterisariarpugut inatsisitigut, taanna qularnanngilaq, aamma sukkut sumilu takorniartaatit ingerlaqqusaanersut, soorunami eqqartorneqartariaqarpoq. Takornariartaassuit inuussutissarsiornikkut iluaqutaagaluartut, inuussutissarsiortunut allanut kalluaasinnaanerat ilisimavarput, taamaammat nakkutilliilluarnissaq eqqarsaatigalugu, aamma takornariartaassuit sumut pulaqqusaarnersut eqqarsaaatigalugu, inatsisitigut sukaterinissaq eqqarsaatigisariaqarparput.

Partiimi siulittaasup aamma kissaatigaa takornariartaatit ataatsikkorsuaq sumiiffimmut ataatsimut tikerartarnerat, inoqarfimmut tikitamut artukkiisinnaasartoq pinaveersaarniarlugu, tikittussat sumukarfissaat siammarnerullugu ataqatigiissaarisoqartariaqalersoq.

- Soorunami aamma ajornartorsiutinik pilersitsisarpoq, ingammik nunatsinni illoqarfinni mikinerni, illoqarfiit ilaat mikigaluarlutik innutaasut marloraataanik amerlassuseqalertarput takornariartaassuit tikikkaangata, taannartaa ajunngikkaluartoq kisiannertaqarpoq, soorunami nakkutilliilluartariaqarpugut, tassami nunarput tikikkumaneqarnera ima annertutigaaq, ilaatigut amerlavallaat tikinneri illoqarfinni mikinerusuni ajornartorsiutaasinnaalluni.

Aamma atuaruk Ocean Explorer: Politiit takornariartaatip suna pillugu ikkarlinnera suli misissuiffigaat

Jens-Frederik Nielsenili umiarsuit tikittartut ikilisariaqarsorinngilai, takornarissat nunatta aningaasaqarniarneranut iluaqutaammata, oqarpoq.

- Soorunami iluarnerussagaluarput tamarsuarmik ataatsikkut tikinneq ajortuuppata, kisianni piffissami qaninnerusumi inatsisitigut qanoq qulakkeerneqarsinnaanersoq takorlooruminaatsippara, tamaattorli takornariartaatit pitsaasumik sulliarigutsigu, nunatut pitsaasumik nittarsaakkutta, nunatut aningaasarsiorfigisinnaagipput, taannalu soruunami qulakkiissavarput, nunatut annertunerpaamik, nunaqavissullu annertunerpaamik pissarsisinnaarat qulakkeerniarlugu.

Naalakkersuisut umiarsuarnik tikittartunik ikilisaanissaq piumasarinngilaat. Naalakkersuisummi Vivian Motzfeldtip(S) takornariartaatit pillugit apeqquteqartoq Nivi Olsen (D) sapaatip akunneri pingasut matuma siornagut akigamiuk, takornariartaassuarnik angalatitsisartut killilersorneqassanngitsut oqaatigaa.

Issittumi sakkutooqarfiup kisitsisaatai malillugit takornariartaatit tikittussat ukioq manna 600-uupput. Siornarnit 200-nik amerlanerupput.