Ocean Explorer: Takornariartaatip assingi videoliallu takukkit
![](/sites/default/files/styles/image_934x467/public/2023-09/Kaptajn%20Jon%20Brian%20Hvidtfeldt%20fra%20Tarajoq.jpg?h=08af07da&itok=04aq31yB)
Ocean Explorerimi Tunup Avannaarsuani ikkannermi ingerlaqqissinnaajunnaartumi issimasut inuunerminni puigugassarinngisaminnik misigisaqarput.
Takornariartaatip naqqa sioraannaasumi ulluni pingasuni maggusimanera pineqanngilaq. Pinngortitarsuulliuna misigititaa pineqartoq.
Pinngortitap kusanarnerpaaffissani takutimmagu, takornariat inuunerminni takorusuttamittut sinnattuat, isiginnaarneqarpoq. Qilak nuiaqanngilluarluni ulloriarpassualik arsarnernik takutitsilluni ippassaq unnukkut alutorsartitsivoq.
- Ippassaq unnukkut arsarneqarami, issimasullu takornariartaatip qaanukaallutik nuannisarput arsarnerillu assilisaqattaarlugit, Tarajoq-p naalagaa, Jóhan Hendrik Garðshorn, savalimmiuni nutaarsiassaqartitsivimmut Kringvarp Føroya-mut oqarpoq.
![](/sites/default/files/styles/image_934x467/public/2023-09/Explorer%20befriet.jpg?itok=RmL9PVPy)
Tarajup Ocean Explorer ullumi kaanngartippaa. Ippassaq misiliigaluarnertik iluatsinngilaa. Jóhan Hendrik Garðshornip Pinngortitaleriffiup ilisimasarnermut umiarsuaanit Tarajoq-mit Takornariartaammi pisut qanimut isigisinnaasimavai.
Jóhan Hendrik Garðshornip inuttaasalu ikiuunnissartik aalajangiukkamikku, toraagartik allanngortippaat, nalunaaquttallu akunnerini 15-ini apuunniarsimallutik.
Takornariartaat kaanngarusussimanngilaq
Umiarsuaaqqap naalagata inuttaasalu takornariartaat immaqap naqqanut maggusimasoq ippassaq tikippaat. Taamma Tunumi Mestersvigip qanitaani kangerlummi Alpefjordimi pinngortitami allanngutsaaliukkami Tunup Avannaaarsuaniittumi ippoq, 206-inik issimasoqarluni.
- Umiarsuaq takornariartaat sammivinnut pingasunut sangutinniarsaralugu nusuttarnerani paasivarput nikisissinnaallugu. Kisianni immap naqqanit kaanngarumanngilaq.
- Annaassiniarneq taamaattoq nalinginnaanngimmat, qanoq iliornissarput pilersaarusiorparput, aammami ulinnganera pillugu piffissaq atorluarusunnarmat, KNR-imut oqarpoq.
- Umiarsuaq nalunaaquttap akunnerini marlunni kaanngartinniartuaraluariarlugu unikkallarniarluta isumaqatigiippugut, naalagaq Kringvarp Føroya-mut oqarpoq.
![](/sites/default/files/styles/image_934x467/public/oembed_thumbnails/2023-09/LF9JFUeLNnPpdxEyP4pwPpWyWl5d3n3jthpMH-ncv7s.jpg?itok=ekj0DVJV)
Tarajoq-p Jóhan Hendrik Garðshorn-illu ullumi misileeqqikkamik Ocean Explorer kaanngarteratarpaat.
- Ullaaq misiliinitsinni, umiarsuaq kaanngarpoq, puttavorlu. Suut tamarmik ajoquteqanngitsutut ipput, umiarsuarlu ilivitsuuvoq, naalagaq savalimmiormiu pisup kingorna ilisimatitsivoq.
Umiarsuaaqqap ilisimatusarnermut atortup ilisimatusaatissanik Tunumi katersitillutik, takornariartaatip ikkarliffiata tungaanut aquutini sangutippaa.
Ullut unnuallu pingasut kaanngarsinnaasimanngilaq
Immap naqqanut maggusimasoq ulluni pingasungajanni nammineq kaanngarniartarsimagaluarpoq iluatsinngitsumik.
Maannali tamarmik ingerlaqqissinnaanngorput, Jóhan Hendrik Garðshorn aamma Tarajoq. Takornariartaat Islandip tungaanut ingerlaarpoq tassani misissorneqassalluni, ilaasullu timmisartoqarfimmit qaninnermit nunaminnut utissapput.
Tarajoq maanna Tunumi ilisimatusaatissanik katersinerminut utissasoq, pinngortitaleriffimmit sisamanngorneq uallisoq nalunaarutigineqarpoq.