Ocean Explorer: Politiit takornariartaatip suna pillugu ikkarlinnera suli misissuiffigaat
Pinngortitaleriffiup ilisimatuussutsikkut umiarsuaaraa Tarajoq ikiortigalugu takornariartaat Ocean Explorer ullaaq ikkarlisimajunnaartinneqarpoq.
Takornariartaat Tunumi kangerluit ilaanni Alpefjordimi ataasinngormat ikkarlereerluni nammineerluni kaanngarsinnaasimanngilaq.
Naallu maanna ikkarlisimajunnaaraluartoq susoqarsimanera politiit suli misissuiffigaat.
Nunatta politiivi tusagassiorfinnut taama ilisimatitsipput.
- Politeeq ikkarlinnginnermi qanoq pisoqarsimaneranik paasiniaasussaq takornariartaammut ippassaq ikivoq, tassungalu atatillugu inuttat arlallit apersorneqarsimalerput.
- Ikilluta paasiniaaqqissinnaanerput ilimanarpoq, nunatta politiivini pigaartut pisortaat Malik Olesen, oqarpoq.
Pisunik paasiniaanerit unnerluutiginnittoqarneranik tigusarinnitttoqarneranilluunniit maannamut kinguneqanngillat.
Politiit ilanngullugu ilisimatitsissutigaat, inuttat oqartussallu akornanni suleqatigiilluartoqartoq.
Ocean Explorer imarsiornermut aqutsisoqarfimmiit peqquneqarpoq piaartumik umiarsualivississasoq, takornariartaatip naqqa aqqartartunit misissorneqarniassammat. Issittumi Sakkutooqarfik taama KNR-imut ilisimatitsivoq.
