Sverige NATO-mut ilaasortanngorniarluni aalajangertoq
![](/sites/default/files/styles/image_934x467/public/article_images/20220516-160556-l-6192x4128ma.jpg?itok=hvAS495N)
Sverigep nunat killiit illersoqatigiiffiannut NATO-mut ilaasortanngornissaa pisortatigoortumik qinnutiginiarlugu Sverigemi naalakkersuisut aalajangerput.
Sverigemi ministeriuneq Magdalena Andersson taama ilisimatitsivoq.
- Iligiit illersoqatigiiffiannut ilaasortanngorniarnerput NATO-mut nalunaarutigiumaarparput, ministeriuneq tusagassiortunut katersuutsitsinermi ataasinngornermi oqarpoq.
- NATO-mut ilanngunnissamut Sverigep inatsisartuini Riksdagenimi amerlanerussuteqarluartoq takuneqarsinnaavoq, Magdalena Andersson oqarpoq.
AAMMA ATUARUK Sverige Finlandilu NATO-mut ilaasortanngornissamut qinnuteqariaannaasut
Sverigep NATO-mut ilaasortanngornissamut qinnuteqarniarnera ilimagineqarsimavoq.
Finland ilaasortanngornissamut aamma qinnuteqarnialersaartoq aamma oqaatigineqarpoq.
Ruslandip Ukrainemik saassussinera peqqutaalluni nunat marluk taakku NATO-mut ilaasortanngorniarput.