Sverige Finlandilu NATO-mut ilaasortanngornissamut qinnuteqariaannaasut
![](/sites/default/files/styles/image_934x467/public/article_images/20220515-183331-l-1000x666-layoutonly-watermarke.jpg?itok=4nWgvVNk)
Sverigemi naalakkersuisut nunat killiit illersoqatigiiffiannut NATO-mut ilaasortanngornissamut ataasinngornermi qinnuteqaateqarsinnaassagunarput.
Sverigemi naalakkersuisut ullumi ataasinngornermi ataatsimeereernerisa kingorna taama pisoqarsinnaavoq. Sverigep oqaluttuarisaanerani tamanna immikkuullarissuuvoq. Sverigemi tv-qarfik SVT taama allappoq.
- Qinnuteqaat qaqugu nassiunneqarumaarnersoq oqaatigisinnaanngilara, ullumili aalajangiisoqarumaarpoq, Sverigep illersornissamut ministeria Peter Hultqvist oqarpoq.
AAMMA ATUARUK Misissueqqissaartartoq: Tyrkia NATO-mut ilanngunnissamut akornusiisinnaavoq
Sverigep NATO-mut ilaasortanngorsinnaanissaa, Sverigemi partiip naalakkersuisuutitaqartup Socialdemokraternap sapaammi akuersissuteqarfigereeraalu NATO-mut ilaasortanngornissamut qinnuteqaateqarnissaq aqqutissiuunneqarpoq.
Sverigep qinnuteqaateqarnerata saniatigut Finland ilaaasortanngornissamut aamma qinnuteqaateqarniarpoq.
Finlandimi naalakkersuisut NATO-mut ilaasortanngornissaq aalajangereerpaat.
Ruslandip Ukrainemik saassussinera pissutaalluni, nunat marluk taakku, arlaannulluunniit maannamut attuumassuteqarsimanngitsut, NATO-mut ilaasortanngornialersaarput.