Misissueqqissaartartoq: Tyrkia NATO-mut ilanngunnissamut akornusiisinnaavoq
![](/sites/default/files/styles/image_934x467/public/article_images/tyrkiet.jpg?itok=xMwfpsB9)
Finlandip Sverigillu NATO-mut ilaasortanngornissaat Tyrkiamit akornuserneqariaannaavoq, Sverigemi Finlandilu peqqarniaasaarniat sulianiaqatigiiffippassuinik peqarnerarlugit, Tyrkiap præsidentia Recep Erdogan nutaarsiassaqartitsivimmi Reutersimi issuarneqarpoq.
Danmarkimi Forsvarsakademimi, sakkutooqarneq pillugu misissueqqisaartartoq major Steen Kjærgaard oqarpoq Erdoganip taama oqarnera nunat immamut Sortehavimut sineriallit pissaaneqarniunnerannut takutitsilluartoq.
Tyrkia NATO-mut ilaasortaavoq, ilaasortaagaluarlunili Ruslandip sillimaniarnikkut peqataaffigisaanut aamma soqutigisaqartuuvoq.
- Taamaammat Erdoganip soqutigisani oqimaaqatigiissiarlugit Sverigep Finlandillu NATO-mut ilanngunissaannut akerlioriaannaavoq. Steen Kjærgaard oqarpoq.
Finlandimi præsidenti ministeriunerlu sisamanngormat oqarput Finland NATO-mut piaarnerpaamik ilannguttariaqartoq.