Issittumi sakkutooqarfik tuttunnianit isornartorsiorneqareerluni: Sungiusarnissat sioqqullugit attaveqatigiittoqarpoq

Nunanit tamalaanit peqataaffigineqartumik sakkutuut sungisarnerat Arctic Light tallimanngorneq septemberip 19-at naammassivoq tassani timmisartut umiarsuillu atorneqarput. Aamma Nuup eqqaani.

Sapaatip akunnera kingulleq KNR-mi saqqummiunneqarpoq Nuummi inuussutissarsiutigalugu piniartut tuttunniarnerminni akornusersorneqartutut misigisut. Taakku oqaatigaa tuttoqarfinni ungasissuni allaat soorlu Nuup kujataani Kangerluarsussuarmi timmiartut qulimiguullit pukkitsuararsuullutik sanioqquttut arlalinnit naammagittaalliutigineqartut.

- Issittumi sakkortooqarfiup arajutsisimanngilaa sungiusartoqarluni pisarnermit annertunerusumik Kalaallit Nunaanni najuuttoqarnerata annertunerata malugineqarsimanissaa, Issittumi sakkutooqarfik Nuummi piniartut naammagittaalliutaannut akissummi allappoq.

Sungiusarneq sioqqullugu ataatsimiinnerit

Nuummi aalisartut piniartullu peqatigiiffiat NAPP KNAPK-mut piumsaqarpoq issittumi sakkutooqarfik attavigissagaat taamatut akornusersuuttarnerup pinnginnissaa siunertaralugu.

Siusinnerusukkut KNR-mi saqqummiunneqartutut Issittumi sakkutooqarfik ilisimatitsivoq kattuffiit oqartussallu susassaqartut sakkutuut sungiusarnerat Arctic Light sioqqullugu ataatsimeeqatigineqarsimasut.

- Sungiusaqatigiinneq Arctic Light ataqatigiissarneqarpoq Naalakkersuisut pisoqarfisunilu najugallit peqatigalugit, tassanilu ilaapput politiit aamma aalisartut piniartullu kattufiat KNAPK. Taamatuttaaq sungiusarnermi pisussat assigiinngitsut pillugit kommunet attuumassuteqartut pilersaarusiornerup nalaani oqaloqatigineqartarput, Issittumin sakkutooqarfimmiit allapput.

Sakkutuut sungiusarnerat Nuup eqqaata saniatiut sumiiffinni assigiinngitsuni pivoq aamma asimi pisoqartarluni.

- Issittumi sakkutooqarfimmiit anguniarneqarpoq sapinngisamik ammasumik akuliuffigineqarsinnaasumillu pisoqarfiusuni najoqarfinni pisoqarnissaa. Taamaattumiik Nuummi, Kangerlussuarmi Sisimiunilu innuttaasunik ataatsimiisitsisoqarpoq aammalu pisut nalaanni innuttaasut internettikkut naapittarfiini tusagassiutinilu ilisimatitsisoqartarpoq, Issittumi sakkutooqarfimmiit allapput.