Danskit ministeriat: Danmark sakkutooqarnikkut toqqaannartumik ulorianartorsiortinneqanngilaq

Illersornissamut ministeri Troels Lund Poulsen (V) naapertorlugu Danmarkip qulaani dronenik angalatitsisoqarnerani kingullermi „saassussinerit assigiinngitsut ataatsikkut atorneqarput“.

“Suliaminnik ilisimasaqarluartut” taamaaliortuupput.

- Danmark sakkutooqarnikkut toqqaannartumik suli ulorianartorsiortinneqanngilaq, illersornissamut ministeri Troels Lund Poulsen (V) illersornissamut ministereqarfimmi tusagassiortunik katersortitsinermi oqarpoq.

Esbjergimi, Sønderborgimi Skrydstrupimilu mittarfiit eqqaanni dronenik takunnittoqarnerata kingorna, politiit piffinnukarsimasut, Jyllandip kujataani Sønderjyllandimilu politiit sisamanngormat unnuakkut tusagassiuutinut nalunaarummi allapput.

Politiit dronet atorneqarsimanerat tamatuma kingorna uppernarsarpaat.

Illersornissamut ministerip inatsisinik atortitsinermut ministeri, naalagaaffiup politiivini pisortaq illersornissamullu pisortaq  sisamanngornermi ullaakkut ataatsimeeqatigai.

Timmisartoqarfinni sakkutooqarfinnilu dronenik unnuakkut takusaqartoqarsimanera eqqartorpaat.

- Saassussineq sakkussiat assigiinngitsut atorlugit saassussineq tassani pineqartutut taarusuppara, Illersornissamut ministeri oqarpoq.

Nassuiarneqanngitsoq

Danskit naalakkersuisui oqartussaasuilu kina kikkulluunniit taamaaliortuunersut suli nassuiarsinnaanngilaat.

- Ruslandimut toqqaannartumik attuumassuteqarnera uppernarsaatissaqartinngilarput, Troels Lund Poulsen oqarpoq.

Illersornissamut ministerip maluginiarpaa dronet nuna tamakkerlugu takuneqaqattaarnerat ataatsikkuungajalluni pisimasoq. Aaqqissugaasumik pivoq, taamaattumillu suliaminik ilisimasaqarluartoq taamaaliortuuvoq.  

Illersornissaqarfiup pisortaa Michael Hyldgaard naapertorlugu dronet issullugit nakkartinneqarsimasinnaagaluarput, taamaaliunnginnissarli aalajangiunneqarsimavoq.

Dronet taakkua nakkartinneqarnerani kingunerlutsitsisinnaanerat eqqarsaatigineqarnera taamatut aalajangernermut peqqutaavoq.

/ritzau/