Københavnip mittarfissua taamaatiinnarnernit kinguaattoornerniillu eqqugaasoq

Københavnip mittarfiani marlunngornermi timmisartuussinerit 100-t missaat taamaatiinnarneqarlutilluunniit kinguaattoorput.

Københavnip mittarfiani ingerlatsinermut pisortaq Kristoffer Plenge-Brandt tusagassiortunik marlunngornermi ullaakkut katersortitsinermi taama oqarpoq.

Tamanna dronet ataasinngornermi akornusersuinerisa kingunerisaanik pivoq, tamannalu timmisartut nalunaaquttap-akunnerini sisamani missinnaanatillu aallarsinnaannginnerannik ilaatigut kinguneqarpoq.

- Timmisartut 400-t ullormut tikittussat 400-llu ullormut aallartussat missaanniipput, taamaattumik timmisartuussinissat tamakkiisumik isigalugit, 10-12 procentii sunnerneqarput, Kristoffer Plenge-Brandt oqarpoq.

Sulinerusariaqartut

Kastrupimiit marlunngornermi angalasussat ilaaffigisassaat arlaatigut eqqugaasimanersoq paasiniarlugu timmisartuutileqatigiiffimmut saaffiginneqqullugit kaammattorpai.

Taamaattoqanngippat pisarnertut mittarfissualiartoqaannassaaq.

- Illuatungeriit tamarmik ullaaq manna sulinerorrapput. Timmisartuutileqatigit, mittarfik Naviair (timmisartorfiusumik nakkutiginnittut aaqq.). Pisumi matumani angalasussat isumagilluarumallugit tamarmik piareersimapput, ingerlatsinermut pisortaq oqarpoq.

Kinguaattoornerit timmisartut arlallit ataasinngornermi unnukkut allamukartinneqartariaqarnerinik mittarfinnullu allanut mittariaqalernerinik peqquteqarput. Taamaattumik miffissaraluaminni maanna amigaataaleqqapput.

Aammattaaq Norgemi Oslop mittarfissuata eqqaani nalunaaqutaq 00.30 aamma 03.30-p akornanni, dronenik angalasoqarnera pillugu assingusumik pisumik nalunaarutiginnittoqarpoq tamannalu kingunerisaanik timmisartut ilai angallavitsik allanngortariaqarsimavaat.

Timmisartuussinissaraluit arfinillit taamaatiinnarneqartut, Monica Fastingip, Oslop mittarfissuani attaveqarnermut pisortap NTB-mut marlunngornerup ullaavani oqaatigaa.

- Danmarkimi Norgemilu timmisartut ilai sumiiffimmiit allamiit aallarnerat peqqutigalugu angalasussat kinguaattoornernut tamatumalu kingunerisaanik kukkunernut piareersimassapput, taanna oqarpoq.

/ritzau/