Sumi qaqugulu? Erlap Kirstenillu innuttaasunik ataatsimiititsinissat pillugit amigartumik paasissutissiisarnerit isornartorsioraat
Inatsit tunngaviusussatut siunnersuut pillugu Nuummi Kujataanilu innuttaasunik ataatsimiititsinissamik paasissutissarsiniarneq ajornarpallaaqaaq.
Innuttaasunik qaqugu ataatsimiititsinissamik taakkunanilu suut oqallisigineqarnissaannik paasisaqarnerorusuttut arlalaliusut taama oqarput.
Erla Vinther taama oqartunut ilaasuusoq Nuummi innuttaasunik aggustip arfernani ataatsimiititsinermi peqataarusussimagaluartunut ilaavoq.
- Innuttaasunik ataatsimiititseqqammernerit tassanngaannarpallaarsoraakka. Taakku pinissaannik taakkununngalu aggeqqussutit pillugit amigartumik paasissutissiisoqartarnera isornavippoq. Taamaaliortoqarniartoq nalunngilara, aasaanerali feeriakaasoqarnerani taamaaliortoqarnera inissaminiissorinngillluinnarpara, aamma angajoqqaarpaat meeqqaminnik efterskolerfissaannukaassileruttorneranni. Taamaannera ajorluinnarpoq, taana oqarpoq.
Nunatsinni inatsit tunngaviususussatut siunnersuutip saqqummiunneqarneraniit ukioq ataaseq qaammatillu arfinilingajaat qaangiuttut innuttaasunik ataatsimiititsisoqarpoq.
Naalagaaffinngornissamut naalakkersuisoq, Vivian Motzfeldt (Siumut) tamatumunnga akisussaasuuvoq.
Innuttaasunik ataatsimiititsinissatik KNR Radiokkut Facebookikkullu nalunaarutigisimagitsik, taanna ilisimatitsivoq.
Tamatumunngali paasissutissiisarnerit amigartut, aamma Nuummeersoq Kirsten Holm isumaqarpoq.
- Ullaakkut tusarakku allanik pisassaqariarama peqataasinnaannginnama uggorivara, Kirsten Holm oqarpoq.
Suliaq naammassivinnissaata tungaanut milinnaaffigerusukkaa
Inatsit tunngaviusussatut siunnersuutip ukiuni kingullerni arfinilinni suliarineqarnerata ingerlanerani amigartumik paasissutissiisoqartartoq, taanna isumaqarpoq.
- Tassani pingaartissimavara, malinnaaffigigakku aamma qilanaaralugu taanna suliaq naammassivinnissaa, Kirsten Holm oqarpoq.
Nuummi innuttaasunik ataatsimiititsisoqarniartoq aamma ullaakkut nalaatsornerinnarmik paasisimagini, Erla Vinther oqarpoq. Danmarkimili feeriarami peqataasinnaasimanngilaq.
- Suliap naammassivinnissaata tungaanut malinnaaffigerusukkaluarpara siunnersuullu atuarlugu. Nunatsinnimi inatsit tunngaviusussaq uani pineqarpoq. Taamaammat inuiaqatigiit siunnersuutip oqallisigineqarnerani peqataatinnissaat pingaaruteqarpoq. Oqallineq angusaqarfiulluaqqullugu inuiaat peqataanissaat pingaaqaaq, Erla Vinther oqarpoq.
Qaqortumi innuttaasunik sapaatit akunnerata siuliani ataatsimiititsinermi takkuttut 14-iupput. Paniaraq Rosing Søltoft taakkununnga ilaavoq, innuttaasunillu ataatsimiititsinissaq pillugu amigartumik paasissutissiisoqartartoq taanna aamma isumaqarpoq. Illoqarfimminnili taamaaliortoqarniartoq tusarsimagini aamma oqarpoq.
- Paasissutissanik nittartakkaminni inuilluunniit nittartakkakkut attaveqatigiittarfiini allani siammarterinerusimasinnaagaluarput, Paniaraq Rosing Søltoft oqarpoq.
Taassumali innuttaasunik ataatsimiititsinermi takkunninni qujamasuutigaa.
- Paasisaqaqaanga, taanna oqarpoq.
Isornartorsiutit tusaatissatut tigugai
Innuttaasunik ataatsimiititsinerit pututitsiniaanerusuusut, Naleqqap siulittaasua Pele Broberg isumaqarpoq.
- Naalakkersuisut ataatsimiititsineri susunukua? Apeqqutissarpassuit, allamullu saasaarinerpassuit, Pele Broberg tusagassiorfinnut nalunaarumminni allappoq.
Innuttaasunik ataatsimiititsinerit aallakaatinneqanngimmata, taassuma aamma tupigusuutigaa.
Amigartumik paasissutissiisoqarsimaneranik isornartorsiuneq qanoq isumaqarfigineraa Vivian Motzfeldt aperigatsinni tusaatissatut tigugini oqarpoq.
Innuttaasunik ataatsimiititseqqinnissaminnut nittartakkakkut toqqaannartumik aallaakaatitsiffigisinnaasaminnik aamma ujartuillutik, taanna ilisimatitsivoq.
- Tusaatissatut tigorusuppara. Innuttaasut oqariartuutaat tamaasa naalaarlugit, aammalu suut pitsanngorsaataasinnaanerannik oqariartuutaat tamaasa tigoorassallugit, aammalu innuttaasunik naapitsitsinerup tamatigut pitsanngoriartortinneqarnissaa taanna ammaffigalugu, taanna oqarpoq.
Innuttaasunik ataatsimiititsinissanik KNR Radiokkut Facebookikkullu paasissutissiisimallutik, taanna aamma oqarpoq. Tamatuma saniatigut sumi qaqugulu innuttaasunik ataatsimiititsinissamik paasissutissartalinnik ornitassaminni inuit naapittarfiini aamma allagarsiisimallutik oqarpoq.
Innuttaasunik ataatsimiititsinissat tullii sumi qaqugulu pissanersut suli nalunarpoq, aggustimili pissangatikkitik Vivian Motzfeldtip oqaatigaa.
- Tullii pilersaarusiorlugit aallartereerpagut. Angalanitsinni pitsanngortinnerusinnaasagut soorunami taakkua nalilersorlugit aamma ingerlanneqarput. Qeqqata Kommuniaaniit avannamukassanerluta Avannaaniilluunniit kujammukassanerluta suli aalanginngilagut, taanna oqarpoq.
