Sulorarnermi nunanut allanut unammisartut nunani tamalaani unammeqataalersut

Nunat mikisut novemberip aallartilaarnerani Maltami unammiuaassamaalerput.

Nunarput tassani peqataatitsiniarpoq toqqagaasullu arlallit aasaq qeqertarmiut unammiuaarneranni Island Gamesimi Nunarput sinnerlugu unammisuupput.

Island Gamesimi arnat ataasiakkaarneranni pissartaq Sara Lindskov Jacobsen peqataassaaq angutinili pissartaasoq Jens Frederik Nielsen peqataasinnaanani nalunaarluni.

Jens Frederik Nielsen suliffimmini ilaquttaminilu ulapikkami Maltamut peqataasinnaanani nalunaarpoq, nuna tamakkerlugu sungiusaasoq Rune Svenningsen KNR-mut oqarpoq.

- Tamanna uannut aamma eqqumiippoq. Tassami aatsaat siullerpaamik nunanut allanut unammisartut angalaqatigilerpakka Jens Frederik Nielsen peqataanngitsoq, Rune Svenningsen oqarpoq.

Maltamut unammiartortussatut toqqagaasut arlallit 20-it ataallugit ukioqarput.

- Inuusupput taamaattorli misilittagakitsuunatik, Rune Svenningsen oqarpoq.

Pikkorissut unammissavaat

Toqqagaasut tassaapput: Toke Ketwa Driefer, Maluk Christoffersen, Julian Arleth, Emilie Sørensen, Cecilia Josenius, Sara Lindskov Jacobsen aamma Tina Amassen Rafaelsen.

- Toke ukiorpassuarni peqatasarpoq aasarli Island Gamesimut peqataanngila qutuiaqqagami. Inuusulluinnartut Maluk aamma Julian angutini peqataaapput sulorarnermi misilittagaqarlualereersut. Inuusuppasipput, misilittagakitsuunngillalli, Rune Svenningsen oqarpoq.

Maltamut angalanissaq pisussanngorpoq Elite Sport Greenland aningaasartuutinik matussutissiisinnaammat.

Nunat peqataasussat tassaapput: Malta, Cypern, Lichtenstein, Island, Isle of Man, Færøerne aamma Gibraltar.

- Uagutsinnut sakkortussaaq. Nunarsuarmi kakkannerit allassimaffiat malillugu nunat arlallit uagutsinnit qaffasinnerusumiipput. Taamaattorli suli tamanut nalunaarutigineqanngilaq unammisartut sorliit peqataatinniarneraat. Taamaattumik sunik naammattuugaqarnissarput oqaatigiuminaatsorujussuuvoq, Rune Svenningsen oqarpoq.

Unamminerit novemberip pingajuaniit tallimaanut ingerlassapput.