Iluaqaaq maanna eqqissillunga meeqqakkalu tamaasa ilagillugit juullisiorsinnaalerpunga.Assi: Megan Hansen

Suliumajunnaarneq taamaatinneqartoq: Ernerma Danmarkimit juullisioriarnissaa maanna qularutigiunnaarpara

Juulli qallivoq, ilinniartorpassuillu angerlarlutik juullisioriartortussaapput. Taakku suliumajunnaartoqaratarsinnaanera pissangallutik utaqqisimavaat.

Timmisartuni saqisut decembarip ulluisa aappaaniit suliumajunnaarniarlutik ilimasaaruteqarlutik sapaatit akunnerata siuliani nalunaaruteqarput.

Illuatungeriit Air Greenland aamma Air Greenlandimi sulisut peqatigiiffiat, FPU saqisut akissarsiai pillugit aaqqiiagiinngissuteqareersut ippassaq isumaqatigiissusiorput.

Nuummi Ilimmarfimmi ilinniartut juullisioriarlutik angalasussat tikeraartoqartussallu eqqissiallassimaqisut naapippagut.

 

Nukaaka A. Møller 23-nik ukiulik inatsisilerinermik ilinniagaqartoq ilulissanut juullisioriartorniarpoq. 

 

Air Greenlandimi sulisut suliumajunnaarnissaat taamaatsiinnartoq qanoq igaajuk?

- Eqqissiallannarpoq. Soorunami pissangalaarnikuuvunga Ilulissanut aallarsinnaassanerlunga, ilaqutakka ornissinnaassanerlugit, kisianni suliumajunnaarnissaat piviusunngunngitsoortoq eqqissiallannarpoq.

AAMMA ATUARUK Air Greenlandimi isumaqatigiissusiortoqarmat suliumajunnaarnissaq taamaatiinnarpoq

Angalanissavit ullui allanngortippigit?

- Ija, plan b-eqarnikuuvunga. Maani ilaqutaqariarama tamaani juullisiuinnarsinnaallunga, kisianni imatut annertunerusumik pilersaarusiorpallaarnikuunnginnama ullut suut aallarfigissanerikka imatut annertunerusumik allanngortoqanngilaq.

Eqqissillutit juullisiorsinnaalerpit?

- Ija.

Suliumajunnaarniartoqarunnaartoq paasillugu qanoq ippit?

- Soorunami. Qujanarmi suliumajunnaartoqanngitsoq, aamma qujanarmi nutaamik isumaqatigiissusiorsimasut, suliumajunnaartoqannginnissaa pillugu taakku sulisunnguit eqqarsaatigalugit.

 

Kuuna Ingemann ilinniartitsisunngorniaq 37-nik ukiulik. Taassuma ernera Danmarkiminngaanniit Nuummut juullisioriarniarpoq.

 

Air Greenlandimi sulisut suliumajunnaarnissaat taamaatiinnartoq qanoq igaajuk?

- Soorunami oqiliallannarpoq qulakkeerlugu ernerma juullisioqatiginissaa nalorninartumiikkunnaarluta.

Ernivit angalanissaata ullui allanngortittariaqarsimavigit?

- Taakkuluunniit periarfissat eqqarsaatiginngilagut juullisioriarnissaa piffissaq taannaannaammat, atuarpoq aamma juulli naappat aalajangersimasumik piffissamik atualerfissaqareerpoq, taamaammat allatut eqqarsarnissarput takorlooruminaakkami annilaanganeq pissanganerlu kisimik piginikuuagut.

Massakkut eqqissillutit juullisioriarsinnaanngorpit?

- Assut iluaallannarpoq meeqqat tamaasa ilagalugit juullisiornissarput qulakkeermat, tassami ernumajunnaarluta tikinngitsuussanersoq oqiliallannarpoq assut.

Suliumajunnaarniartoqarunnaartoq paasillugu qanoq ippit?

- Oqiliallaqqaqaagut tamatta, aamma angalusussaq taanna. Annilaangami nalunaarutigineqaqqaarmat kontakt familiai aamma ingerlaannaq assiliillutik nassiussillutik ernumalluta tamatta allartippugut, taava kisianni soorunami paasigakku taamaaliortoqalinngitsoq oqiliallannaqaaq.

 

Petra Olsvig Inûsugtok 24-nik ukiulik. Ilinniartitsisunngorniaq. Sisiminut juullisioriartorniarpoq.

 

Air Greenlandimi sulisut suliumajunnaarnissaat taamaatiinnartoq qanoq igaajuk?

- Ilorraallannarpoq ilaquttat ilagissagakkit, ukioq kingulleq juullisioriarfiginikuunnginnakkit ilagisussanngorlugit ilorraallannarpoq.

Angalanissavit ullui allanngortippigit?

- Naa, aatsaat ippassaq billetsi isumagigami isumaqatigiinnerit aalajangiffaarereersut.

Eqqissillutit juullisioriarsinnaanngorpit?

- Aap.

Suliumajunnaarniartoqarunnaartoq paasillugu qanoq ippit?

- Asuki malugivallaanngilara uanga, aatsaat isumaqatigiissusioreersut billetsi isumagigami malugivallaanngilara iluamik.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl