Inatsimmik allannguiniarneq: Sulitilluni tarnikkut innarliineq pillarneqaataasalissaaq
Sulitillutit nikassaasoqarpat narrunarsaasoqarpalluunniit, taava taamaattoqarneranik Sullivinnik Nakkutilliisoqarfimmut qanittukkut naammagittaalliuteqarsinnaalissaatit.
Sulinermi tarnikkut atugarissaarnissaq sulinermi timikkut atugarissaarnertulli pingaartinneqarluni inatsisitigut pisinnaatitaaffiulissaaq.
Folketingimi amerlanerussuteqartunit maajip naanerani akuerineqassangatinneqartumik nunatta sullivinni atukkat pillugit inatsisaanik allannguinikkut tamanna pissaaq.
Inatsisartut tamatumunnga inatsissatut siunnersuut siorna ukiakkut akueraat. Nunatsinnili sullivinnik nakkutilliineq pillugu suliassaqarfik naalagaaffiup suli akisussaaffigimmagu, inatsisissatut siunnersuut atulertinnagu inatsimmik allanngunissaq Folketingimit akuerineqaqqaartussassaaq.
Sulinermi tarnikkut atukkanik nakkutilliisarnissaq inatsisitigut piumasaqaataalissasoq
Inatsisissap immikkoortua siulleq sulitilluni tarnikkut atugarissaarnissamik pisinnaatitaanermut tunngasuussaaq.
Tassa sulitilluni tarnikkut atukkat sullivinnik nalilersuinermi, APV-mik taaneqartartumi, aamma misissuiffigineqartalissapput. Sulliviit tamarmik APV-liortartussaatitaapput.
Sulinerup avataani tarnikkut innarliineq sulinermut attuumassuteqarpat, sulliviup tamatumani akisussaatinneqarnissaa inatsimmillu taassuminnga unioqqutitsisunut akiligassiinerusoqartalernissaa inatsimmik allannguinermi aamma piumasaqaataalissaaq.
Aamma Sullivinnik Nakkutilliisoqarfik sullivinni tarnikkut innarliisoqarsimatillugu qullersaq avaqqutiinnarlugu sulisunik oqaloqateqarsinnaalisssaaq.
Napparsimalluni sulinngitsoortarneq sulitillunilu tarnikkut atukkat arlaatigut imminnut attuumassuteqassangatikkini, Demokraatineersoq Anna Wangenheim inatsimmik allanngunissaq Inatsisartut siorna siullermeermassuk erseqqissaavoq.
- Nunatsinni napparsimallutik sulinngitsoortut amerlavallaarput, tamannalu sulinermi tarnikkut atugarliornermik nunatsinnilu sapaatit akunneranut suliffiusartup nunanut allanut naleqqiukkaanni sivisuallaarneranik peqquteqarsimasinnaavoq.
Sullivinni isumannaallisaanermi pitsannguisoqartoq
Nunatsinni sulitilluni ajutoornerit toqumik kingunillit ukiuni kingullerni arlaliupput. Toqumik kinguneqartumik sulitillutik nakkarlutik ajutoortut Nuummi 2022-miinnaq pingasuupput, taakkunannga sanaartorfinni marluupput.
Sullivinni isumannaallisaanermi piumasaqaatit inatsisissami sukannernerulerput, aamma sulisut kisimiillutik sulinerannut tunngasuni.
Nunatsinni sullivinni isumannaallisaaneq pillugu inatsit kingullermik 2005-imi nutarterpoq. Danmarkimilu tamatumunnga inatsit tamatuma kingornali 25-eriarluni nutarterpoq.
Nunatsinni sullivinnik nakkutilliineq pillugu suliassaqarfik nunatta qaqugu akisussaaffigilissaneraa, Inatsisartut suli oqallisigaat. Naalakkersuisulli inatsimmi piumasaqaatinik 2019-imi nutartereqqusipput.