New Yorkimi Columbia Universityp eqqaani akerliussutsimik takutitsisut politiinit peersinneqartut
![](/sites/default/files/styles/image_934x467/public/2024-05/20240501-064523-L-1920x1280we.jpg?itok=Q9LU1l3H)
Palæstiinamiunut illersuillutik New Yorkimi ilisimatusarfiup Columbia Universityp eqqaani akerliussutsimik takutitsisut politiinit pingasunngornermut unnuaani peersinneqarput. Akerliussutsimik takutitsisut maanna sapaatit akunnerini arlaqalersuni tupilerlutik ilisimatusarfiup eqqaani akerliussutsimik takutitsipput.
Aviisip The New York Timesip allaaserisaa naapertorlugu politiit hundredelikkuutaat sakkulisarlutik ilisimatusarfiup eqqaanukarput.
Politiit ilaat toqqinut ilisimatusarfiup eqqaani napparneqarsimasunut qaammartartunik qinnguartaapput allat ungalusaliorlutik.
Akerliussutsimik takutitsisut tusagassiortullu ilisimatusarfiup Columbia Universityp illutaata Hamilton Hallip eqqaaniittut politiinit peersinneqarput.
Politiit ilisimatusarfimmukarnissaat sioqqullugu Columbia University nalunaaruteqarpoq, akerliussutsimik takutitsisut iliuuserisaat sakkortusiartuinnarmata ilisimatusarfimmit tamanna ajuusaarutigneqarmat.
Ilisimatusarfiup illutaa Hamilton Hall pingasunngornermut unnuaani akerliussutsimik takutitsisunit tiguarneqarpoq aserorteriffigineqarluni assersorneqarsimallunilu, taamaattumik allatut iliuuseqarsinnaasimanngilagut. Columbia University taama nalunaaruteqarpoq.
Palæstiinamiunut illersuillutik akerliussutsimik takutitsisut 100-nik sinneqartut Columbia Universityp eqqaani tupertut sapaatit akunneri marluk matuma siorna politiinit tigusarineqarnerata kingorna politiit unnuaq iliuuseqarput.
Akerliussutsimik takutitsillutik toqqinik nappaasut taamanilu amerliartuinnarsimapput.