Isumaqatigiissutitaaq: Sakkutuujusussaatitaaneq Danmarkimi arnanut angutinullu naligiimmik atuutilertoq
Danmarkimi sakkutuujusussaatitaaneq angutinut arnanullu naligiimmik atuutilissaaq.
Illersornissaq pillugu isumaqatigiissutitaaq Folketingimi amerlanerussuteqartunit marlunngornermi unnukkut isumaqatigiissutigineqarpoq.
Illersornissaq pillugu isumaqatigiissutitaaq nunatsinni naalakkersuisut Savalimmiunilu naalakkersuisut suleqatigalugit isumaqatigiissutigineqartut, isumaqatigiissutitaami aamma allaqqavoq. Isumaqatigiissutitaaq 2027-mi januaarip aallaqqaataani atuutilissaaq.
Sakkutuujusussaatitaanerli Danmarkimi najugalinnut taamaallaat atuuppoq. Sakkutuujusussaatitaaneq Kalaallit Nunaanni Savalimmiunilu najugalinnut atuutinngilaq, taamaattorli tunngaviusumik upalungaarsimanermut ilinniarfimmut Kangerlussuarmiittumut qinnuteqartoqarsinnaalluni.
Kalaallit savalimmiormiullu sakkutuujusussaatitaannginnissamut qinnuteqarsinnaasut
Taamaakkaluartoq arnat angutillu Kalaallit Nunaanni Savalimmiunilu najugallit Danmarkimut nuunneranni sakkutuujusussaatitaaneq taakkununnga atuutissaaq, danskit inuusuttut sakkutujuusussaatitaanerat assigalugu. Isumaqatigiissutitaami taama allaqqavoq.
Kalaallit Nunaanni Savalimmiunilu sivikinnerpaamik ukiut qulit najugaqarsimagaanni sakkutuujusussaatitaannginnissamut qinnuteqartoqarsinnaavoq.
Sakkutuujusussaatitaasutut nalunaarsoqqasut siorna 4.700-pput, taakkuali malunnartumik tassa ukiumut 7.500-nngorlugit amerlineqassasut, politikerit aalajangerput.
Sakkutuujusussaatitaaneq qaammatit tallimaniit aqqanilinnut aamma sivitsorpaat.
Sakkutuujusussaatitaanermik isumaqatigiissutitaaq Danmarkip illersornissaq pillugu isumaqatigiissutaata 143 milliardit koruuninik aningaasaliinertallip sakkutuuliinerunissamik aamma imallip ilagaa.