Danmarkip naalakkersuisui sakkutuujusussaatitaanermi naligiissitaanerulersitsiniartut

Danmarkimi sakkutuujusussaatitaanermi ukiualuit qaangiuppata naligiissitaaneqalissaaq.

Ministeriuneq Mette Frederiksen, illersornissamut ministeri Troels Lund Poulsen nunanullu allanut tunngasunut ministeri Lars Løkke Rasmussen tusagassiortunik katersortitsinermi taama oqarput.

Danmarkimi sakkutuujusussaatitaanerup aaqqissuusseqqiffigineqarnissaa Danmarkimi naalakkersuisut siunniuppaat, arnat angutillu akornanni naligiissitaanerusoqalissalluni.

- Danmarkimi inuusuttut illersornissaq pillugu peqataanerulernissaat pingaaruteqarpoq. Sakkutuujusussaatitaanerlu nukittorsarneqartariaqarpoq, illersornissamut ministeri Troels Lund Poulsen (V), Danmarkimi naalakkersuisuni qullersat tusagassiortunik katersortitsineranni ilaatigut oqarpoq.

Sakkutuujusussaatitaaneq ullutsinnut naleqqussarneqartariaqarpoq. Sakkutuujusussaatitaanermilu naligiissitaanerusoqalernissaa Danmarkimi naalakkersuisut taamaammat siunniuppaat.

Tassa imaappoq, suiaassuseq apeqqutaanani sakkutuujusussaatitaaneq eqqunneqassaaq.

Danmarkimi naalakkersuisut illersornissaq pillugu isumaqatigiissutissatut siunnersuutaata immikkoortuisa ilaat taama nipeqarpoq.

Sakkutuujusussaatitaanerullu qaammatinut aqqanernut sivitsorneqarnissaa Danmarkimi naalakkersuisut aamma siunnersuutigaat.

Nutaarsiassaqartitsivik Ritzau taama allappoq.

Danmarkimi illersornissaqarfiup 40 milliardit koruunit nalinginut nukittorsarneqarnissaa tusagassiortunik katersortitsinermi aamma oqaatigineqarpoq.

Danmarkimi naalagaaffimmi tunisat ataatsimut nalingisa 1,4 procentiisa missaat Danmarkip illersornissaqarfimmut 2023-mi atorpai, taakkunanngalu 0,6 procentit missaat Ukrainemut ikiorsiissutitut atorneqarlutik.

- Sorsuttoqaleratarsinnaanera pinngitsoortinniarlugu sakkussiorpugut, Mette Frederiksen tusagassiortunik katersortitsinermi oqarpoq.