Socialdemokraatit: Danskit inuusuttut amerlanerusut sakkutuujusussaatitaassapput

- Danmarkimi illersornissatsinnik pitsanngorsaanissarput pisariaqarmat sakkutuujusussaatitaasut amerlaneroqqissapput.

Socialdemokraatit illersornissaq pillugu oqaaseqartartuat, Simon Kollerup oqarpoq.

Danskit naalakkersuisuisa illersornissamut isumaqatigiissut nutaaq kalaallit savalimmiormiullu partiivisa Folketingimi isumaqatigiinniuteqarfigisassaat sapaatip akunnerani matumani saqqummiutissavaat.

Uanilu sakkutuujusussaatitaasut amerlanerusut ilaassasut, Simon Kollerup oqarpoq.

- Illersornissamik sakkutuussarsiorfiusinnaasumik siammasinnerusumik pisariaqartitsivigut, danskit angutit arnallu inuusuttut amerlanerusut sakkutuujusussaatitaanissaat pisariaqartipparput, illersornissamimmi sanngissuumi tamanna sanngissuumik tunngaviuvoq.

Dansk Folkepartiimit sakkutuujusussaatitaanerup Savalimmiuni Kalaallit Nunaannilu aamma atuunnissaa kissaatigineqarpoq.

- Savalimmiormiut kalaallillu ullumikkut sakkutuujusussaatitaanngillat. Isumaqarpugullu savalimmiormiut kalaallillu imaanut, Nunanut Avannarlernut Issittumullu tunngasunik ilisimasaqarluarmata tamanna pitsaasuussasoq. Tamanna sakkutuuni imarsiortuni amigartunik inuttaqarfigisatsinni pitsaalluinnassaaq, Alex Ahrendtsen oqarpoq.

Kalaallit inuusuttut Illersornissaqarfimmi sakkutuujusussaatitaalernissamut ullumikkut nammineq kajumissutsiminnik nalunaartarput.

Kalaallit inuusuttut sakkutuujusussaatitaalersinneqarnissaat nunatsinni partiinit kissaatigineqanngilaq. Naalakkersuisulli kalaallit inuusuttut amerlanerusut Illersornissaqarfimmut qinnuteqarnissaannik siusinnerusukkut kaammattuuteqarfiginikuuaat.

Naalakkersuisulli Illersornissaqarfiup nunatsinni sakkutuujusussaatitaanermut misiliititsisarnerat 2021-mi atorunnaarsippaat.

Simon Kollerupilli qanoq amerlatigisut saniatigut pisariaqartinneqarnersut, sakkutuujusussaatitaanerup qanoq sivitsortigineqassanera, imaluunniit sakkutuujusussaatiaaneq angutinut arnanullu atuutilissanersoq oqaaseqarfigerusunngilaa.

- Naalakkersuisuni tunngavitsitut allatatsitulli sakkutuujusussaatitaanermi naligiissitaanerusoqalernera qularutissaanngilaq. Taamaammat tamanna aamma misissussavarput, Simon Kollerup oqarpoq.