Sakkutooqarnikkut piginnaanngorsaaneq nunatta Ruslandillu akornanni attaveqatigiinnerannut nunatsinnilu inuussutissarsiornermut ajoqutaassaaq.

Naleqqap siulittaasua, Pele Broberg, taama isumaqarpoq.

- Neriorsuutinik unioqqutitsineq inuussutissarsiornermut qanoq akeqqersimaartiginersoq tupaallaatigaara. Sakkutuuliineruneq nalornisitissaaq, aningaasaliinissamullu annilaangasoqalissalluni. Sakkutooqarnikkut piginnaanngorsassagutta takornariaqarnermi ineriartortitsinissaq takorluukkatut pinavianngilaq, taanna oqarpoq.

Sulisitsisulli pisortaat, Christian Kjeldsen, isumaqataanngilaq. Taassuma sakkutooqarnikkut piginnaanngorsaaneq nunatsinni aningaasarsiornissamut periarfissarsiisinnaassasoraa.

- Aningaasaliinissamik amigaateqarnerup illersornissaqarfimmut atassuteqarnissaanut uppernarsaammik tusaasaqarnikuunngilagut.

Sakkutuut imaluunniit innutaasut

Issittumi Sakkutooqarfik qulimiguulinnik marlunnik, sakkutuunik, sakkutuunik immikkut sungiusakkanik, sorsuuteeqqamik timmisartunillu pingasunik F-16-inik junip ingerlanerani sungiusarpoq. 

Sungiusarnerli sakkutooqarnermut tunnganerorpasippoq, sakkutuujunngitsunut tunngasoorpasinnani. Pele Brobergip tamanna Naalakkersuisut nunanut allanut tunngasunut periusissiaannut akerliusutut isornartorsiorpaa. Aamma innuttaasut atugarissaarnissaannut ajoqutaassasoq, taanna isumaqarpoq.

- Sakkutooqarnikkut najummasimaartorsiornerit innuttaasunut atugarissaarnerutitsinavianngillat. Akerlianilli angingaasat suliffinnut innuttaasullu peqqissusaannut atorneqarnatik sakkutuunut atorneqartarput.

Pele Brobergip piginnaanngorsaanermut akerliunani erseqqissaatigaa. Sakkutuujunngitsunut tunngasut, soorlu nakkutilliinerusoqarnissaa nunatsinnilu Islandimitut ittumik sinerissami alapernaarsuisoqarnissaa Naleqqami kissaatigaat. Piginnaanngorsaanerli sakkutooqarnermut tunnganeruppat, amerikamiut aningaasaleerusukkunnaarnissaannik kinguneqartumik nalornisoqalernissaa ernummatigaa. Assi © : KNR / Markus Valentin

Taamaammat aningaasat piginnaanngorsaanermut atorneqartut ulluinnarni atorneqarsinnaasunut, inuussutissarsiornermillu siuarsaasinnaasunut atorneqarpata pitsaanerussasoq Pele Broberg isumaqarpoq.

- Aningaasat sakkutuut atortuinut inuiaqatigiinnulluunniit atorneqarsinnaapput. Aningaasat sakkutuunut atorneqarpata, taava suliat allamut saassapput, suliffiillu sakkutuujunngitsunut tunniussakinnerussallutik. 

Nunatta karsianit illersornissaqarfimmut Issittumi Sakkutooqarfimmullu qanoq aningaasalersuisoqartigiva? 

- Nul.

Taava Kalaallit Nunaannut ajoqutaanaviarunanngila?

- Nalorninartorsiortitsivoq, nalorninartorsiornerlu aningaasaliinngitsoortitsisarpoq. Piginnaanngorsaleruttussaguta, amerikamiut suliffii qanoq eqqarsassappat?

Sulisitsisut akerliliisut

Christian Kjelddsen akerlianik isumaqarpoq. Piginnaanngorsaaneq nunatsinni suliffinnut periarfissiisinnaasoq, taanna isumaqarpoq.

- Najuunneruneq inuiaqatigiinnut pilersitsissasoq uanga isumaqarpunga. Aningaasat danskinit aningaasaliissutigineqartut nunatsinnut eqqutaapput. Aningaasat taakku siusinnerusukkut nunatsinniinngillat, taakkulu suliniuteqartitsisinnaassapput.

Sulisitsisut pisortaat Pele Brobergip isumaata akerlianik isumaqarpoq. Sakkutooqarnikkut piginnaasanngorsaaneq aningaasarsiornermut periarfissiissasoq, Christian Kjeldsen isumaqarpoq. Taanna ingerlatseqatigiiffinnit Illersornissaqarfimmut pilersuerusuttunit saaffigineqareerpoq. Aningaasaliinissamullu nangaasoqarpat, sakkutooqarnikkut piginnaanngorsaaneq pissutaanngitsoq taanna isumaqarpoq. Assi © : KNR / Markus Valentin

Sulisitsisut Illersornissaqarfimmut qanoq pilersuisunngortoqarsinnaanersoq pillugu ilitsersuummik suliffinnut nassiusseqqammerpoq. Pilersuisuunissaq inuussutissarsiortunit pilerigineqartoq pisortap malugisinnaavaa.

- Danskit illersornissaqarfiat aningaasanik tamaani atuippat, Kalaallit Nunaannut aningaasarsiorfiussaaq. Tamaattoqarnissaa aamma naalakkersuisunit piumaneqartareerpoq.

Annernut isumaqatigiissutit Danmarkimiissasut

Nunatsinni suliffiit sulianut annernut soorlu sorsuutiliornissamut illersornissaqarfimmik isumaqatigiissusiorsinnaanngikkaluartut, nunatsinni suliffiit suliaqarfinni arlalinni aningaasarsiorsinnaasut Sulisitsisuneersoq Christian Kjeldsen isumaqarpoq. 

- Illersornissaqarfimmut paassanik aqerlunnillu atortussiorfeqarunnaarnikuuvugut. Kisianni arlalinnik pilersuisuulersinnaakutsoorpugut.

Innuttanik nunatsinnukartoqassappat, attaveqaatersuutinilluunniit sanaartortoqassappat, nunatsinneersut sanaartornissamut kiffartuussinissamullu suliarinnittussarsiuussinerni neqerooruteqarnissaminnut piareersimasut, pisortap immikkut erseqqissaatigaa.

- Sakkutuunik maani najugaqartoqassappat, barakkiliorsinnaavugut. Radarilersuisoqarniarpat, tunngavissiorsinnaavarput. Taava soorlu asaanermut, naatsorsuusiornermut biiliussinermulluunniit kiffartuussisoqarsinnaavoq, taakkulu pitsaasunik pilersitsissapput.