Aaja Chemnitz sulinermi ajoqusertoqarnera pillugu: Danmarkip akisussaaffini naammassinngilaa

Angut 64-inik ukiulik Nuummi Usisaatip quersuani, meterinik arlalinnik portussuseqartumit marlunngornermi nakkarnermini ajunaarpoq.

Ukioq manna sulitilluni ajutoornerit toqumik kinguneqartut pingajoraat. Taakkulu pingasunik amerlavallaarput.

Folketingimut ilaasortaq, Aaja Chemnitz (IA) oqarpoq, danskillu naalagaaffiat Nunatsinni sullivinnik nakkutilliivimmik naammattumik isumaginnissimannginnerarpaa.

Nakkutilliivik aningaasanik amigaateqartoq taanna isumaqarpoq, taassumalu oqarnera naapertorlugu tamanna nunatsinni sullivinnik nakkutiginninnerup amigarneranik kinguneqarpoq.

- Suliassat amigaataanerat ersarippoq. Isumalluuteqarnerulernissaa pisariaqartinneqarpoq. Isumalluutit ilaannaat nunatsinni nammineq pissarsiarisinnaanngilagut, danskit tungaanniit aaqqissuussinermi nassaartoqartariaqarpoq, folketingimut ilaasortaq KNR-imut oqarpoq.

Nakkutilliinerit qanoq amerlatigineri qularnartoq

Nunatsinni sullivinnik nakkutilliisoqarfiup elevatorinik inatsisit malillugit nakkutiginninnerisa arlallit saniatigut sullivinnik nakkutilliinerit ukiumut 120-nit 230-nut isumagineqartartut nakkutilliiviup nittartagaani allassimavoq.

Aaja Chemnitzip Danmarkimi suliffissaqartitsinermut ministeriusimasumut, Mattias Tesfayemut (S)  ukioq manna februaarimi allakkamini nunatsinni nakkutilliinerit amerlassusaat assannik atorlugit naatsorsugaasut taamaammallu qularnaateqartut paasissutissiissutigaa.

Sullivinnik Nakkutilliisoqarfiup Danmarkimi sulinermi avatangiisit sullivinni sulisunut apeqqutit atorlugit misissorneqartartut allakkami paasissutissiissutigaa. Apeqqutillu taakku Kalaallit Nunaannut naleqqussagaanngillat. Naleqqussagaassappatalu susassaqarfimmut aningaasaliisoqarnerussasoq, allassimavoq.

AAMMA ATUARUK Tusagassiaq: Angut 64-nik ukiulik ajunaartoq

Sullivinnik Nakkutilliisoqarfiulli nunatsinni sullivinni ornigulluni nakkutilliinermut aningaasanik pisariaqartitsisoqarnersoq allanngilaa.

Kalaallit Nunaanni Sullivinnik Nakkutilliisoqarfiup immikkoortortami pisortaata nakkutilliiviup suliaqarnera aningaasaqarneralu qanoq iginerai paasiniarlugit KNR-ip oqaaseqartinniarsaraa. Tamannali suli iluatsinngilaq.

Aaja Chemnitzilli nunatsinni sullivinnik nakkutilliisoqarfiup aningaasaqarnikkut pingaarnersiorneqannginnerunera qularutiginngilaa.

- Suliatigut peqatigiiffiit assersuutigalugit oqaloqatigigaanni Sullivinnik Nakkutilliisoqarfiup nakkutiginninnermik suliaqannginnerunera ernumassutigingaatsiartarpaat.

Suliffeqarfiit sulinermi avatangiisigissaarnissamik aamma Sulinermi avatangiisinut siunnersuisoqatigiit sulisitsisut peqataaffigisaat aqqutigalugu qulakkeerinissaq namminneq akisussaaffigigaat taassuma erseqqissaatigaa. Sullivinnik Nakkutilliisoqarfilli nakkutiginninnermik suliaqartussaavoq.

Aningaasaqartuartinneqassasoq

Danskit naalakkersuisuisa Nunatsinnut Savalimmiunullu suliniutinut aningaasaliissutinit tassa Atlantikup Avannaamiunut aningaasaliissutinit Kalaallit Nunaanni Sullivinnik Nakkutilliisoqarfimmut aningaasaliinerunissaq siunnersuutigaat.

Kisianni uani suliniutit nalinginnaasumik piffissamut sivikinnerusumoortuupput – assersuutigalugu kalaallit tussiutissaannut nutaanut aamma Nuummi Kofoed Skolemut aningaasaliinerit. Nunatsinnilu Sullivinnik Nakkutilliivimmut aningaasat taakkunannga pissarsiarineqassanngitsut, Aaja Chemnitz isumaqarpoq.

AAMMA ATUARUK Person omkommet efter endnu en stilladsulykke i Nuuk

 - Aningaasaliissutit taakku piffissap ingerlanerani nungukkumaarput. Sulinermilu avatangiisit ingerlatsinerup piviusup ilagaa.

- Aningaasanut inatsimmeersuunissaat, aamma (Danmarkimiit aaqq.) akisussaaffimmik akuerisoqarnissaa kissaatigaara. Danmarkimi Sulinermik Nakkutilliinerup suliaqarnera qiviaraanni taanna qaffasinnerulluinnartumiippoq.

Danskit naalakkersuisuisa 2023-mut aningaasanut inatsisissaat Folketingimi pingasunngormat oqaluuserineqarpoq. Kisianni aningaasanut tunngasunut oqaaseqartartup, Benny Engelbrechtip (S) nunatsinni Sullivinnik Nakkutilliisoqarfimmut aningaasaliinerusoqarsinnaanissaa neriorsuutigisinnaanngilaa.

Nuummi sanasut suliffeqarfiani inummik stilladsinit nakkarnermini aggustimi ajunaartoqarpoq.

Tamatuma pinnginnerani qaammatialuit siornatigut angut 60-inik ukiulik Nuummi sanaartorfimmi aamma ajunaarpoq.