Sulisussaaleqineq: - Qinnuteqartoqarneq ajorpoq
Nunatsinni suliffeqarfiit naammattunik sulisussarserusukkaluarlutik tamaviaarput. Suliffeqarfippassuarni pissutsit piviusut, Sulisitsisuni siulersuisunut siulittaasoq, neriniartarfinnik akunnittarfinnillu inuussutissarsiuteqartup Krissie Berthelsen Winbergip oqaatigai.
- Suliffeqarfiutiga sulisussanik nunatta avataaniit tikisitsillunga sulilersitsisimanngikkaluaruma napatissinnaasimanavianngikkaluarpara. Nunaqavissunik sulilersitserusunnginneq pineqanngilaq. Taamaaliorusoqaagummi – qinnuteqartoqarneruna ajortoq, taamak Nuummi kaffisorniartarfinnik nuannarineqarluartunik Café Pascuccimik Café Esmeraldamillu aqutsisoq Krissie Berthelsen Winberg oqarpoq.
Nunanit allaneersunik sulisoqarnissani taamaammat siunniussimavaa, taamatullu aalajangernera amerlasuunit ilaatigut apeqquserneqarpoq.
Avissaartuutsitsissutaasoq
Nuummi sapaatip-akunnerata naanerani Sulisitsisuni aallartitaasut ataatsimiisinneqarput, tassani ajornartorsiutaasoq sulisussanik qanoq orniginarsaasinnaaneq pillugu ataatsimiittoqarluni. Ataatsimiittoqarneranilu Krissie Berthelsen Winberg siulersuisunut siulittaasutut qinigaaqqippoq.
Suliffeqarfiit nunaqavissunik eqiasuttuunerarneqarlutillu atorneqarsinnaanngitsutut nalilerneqarlutik sulisorineqarumannginnerat, inoqatinut attaveqaqatigiittarfikkut oqallittarfitsigullu oqallisaasartut, Krissie Berthelsen Winbergip misigisarpaa.
- Paatsuuineruvoq. Kikkut sulerusunnersut paasiniaqqaartarpara. Allanillu sulisussaqannginnama nunanit allaneersut sulisorilertariaqartarpakka, nunaqavissummi qinnuteqarneq ajormata, taanna oqarpoq nangillunilu:
- Sulisussarsiorluta allagaqartuaannarpugut - qinnuteqartoqarnerli ajorpoq, Krissie Berthelsen Winberg oqarpoq.
Kalaallit Nunaanni inuusuttut amerlasuut suliffeqarnatillu ilinniagaqanngitsut taassuma tikkuarpaa. Inuusuttut amerlanerit suliffeqalersinniarneqarnissaat ilinniartunngornissaallu pillugu iliuuseqartoqartariaqartoq taanna isumaqarpoq.
Ilinniarsimasut pilerngunneqartut
Sulerusussusillit amigaatigineqanngitsut, ilinniarsimasulli amigaatigineqartut Krissie Berthelsen Winberg isumaqarpoq. Neriniartarfiutilinni amigaataasut tassaapput saqisutut igasutullu ilinniarsimasut, taanna oqarpoq.
- Ilinniartartuvut naammanngillat. Nunaqavissut sulisorisavut pikkoreqaat, kisianni taakku aamma pilernguppagut, Krissie Berthelsen Winberg oqarpoq.
Sulisunik naammattunik peqarumalluni sulisussanik nunanit allaneersunit ukiuni kingullerni sulisoqartariaqarsimavoq - ilaatigut Filippinerimiunik.
- Amerlanerit ukiorpaalunni sulisorinikuuagut, pingaaruteqarlutillu. Taakku sulisorisimanngikkaluarukkit loungemik pisiniarfimmilluunniit ammaasinnaasimassanngikkaluarpunga, taanna oqarpoq.
Nunaqavissut amerlanerit sulisorilersinnaanissaat Krissie Berthelsen Winbergip kissaatigaa, kalaallillu ilinniartut amerlineqarnissaat pikkorissarnissaallu pillugit suliniutit tamanna pillugu ujartorlugit.
Kalaallit Nunaanni sulisoqarniarnikkut ajornartorsiortoqartoq, suliffeqarfiillu inuiaqatigiillu tamanna pillugu iliuuseqarfigisariaqaraat, taanna isumaqarpoq.
- Inuiaqatigiinnguusugut ikittunnguit miserratigissanngilarput. Akisussaassusermilli tigusinissamut tunuarsimaassanngilagut, aaqqiissutissanillu ataatsimoorluta ujartuilluta, Krissie Berthelsen Winberg oqarpoq.
