Polar Seafoodimi piginneqataasoq unnerluutigineqartoq
Eqqartuussisoqarfik Sermersuumi marlunngornermi, suliamik uissuuminartumik eqqartuussisoqarpoq.
Eqqartuunneqartoq tassaavoq suliffeqarfimmi Polar Seafoodimi pisortaq, piginneqataasorlu, Bent Friis-Salling.
Taanna pinerluttulerinermi inatsit paragraf 88 naapertorlugu tassa nakuuserniarsimasuttut unnerluutigineqarpoq.
Imerniartarfimmi kamaattut
Nuummi imerniartarfiit ilaanni Daddy´simi decembarip 18-ianni 2021-mi nalunaaqutaq unnuakkut ataatsip marlullumi missaani pivoq.
Angutip isaa talerpia tungaaniitoq toorneqarsimasoq unnerluussummi allaqqavoq, Bentilli nassuiaanerani isaa saamerleq toorneqarpoq.
Eqqartuussisoqarfik Sermersuumi eqqartuussisup Bent Friis-Salling siuminut ingeqquaa taamanilu pisumik susoqarsimaneranik nassuiaaqqullugu.
Bent Friis-Salling billardertilluni angutit marluk saassussisiniartutut pissusilersortut ornigupput aappaalu tikkuaatigalugu peeqquniarlugu isaatigut toortoorpaa.
Piniarnani pisoortoq
Pinerluffigineqartoq eqqartuussisoqarnerani najuutinngilaq.
Bent Friis-Sallingili nakuuserniarsimasutut nassuerpoq.
Unnerlusssisussaatitaasut piumasaringaluarpaat ulluni 60-ni inissiisarfimmiitussanngortinneqassasoq, taamaattorli eqqartuussisoq aalajangerpoq mianersoqqussummik tunineqassasoq.
Bent Friis-Sallingip atia saqqummiunniarlugu KNR aalajangerpoq, taanna nunatsinni suliffeqarfissuarni piginneqataallunilu inuiaqatigiinnit soqutigineqarnera peqqutigalugu.
