Avannaata Kommunia: Sulineq aallartereerpoq
- Piareeqqavugut, sulineq nalinginnaasumik ingerlalereerpoq, Avannaata Kommuniani borgmesteri Palle Jerimiassen oqarpoq.
Ikaarsaariarnermi ataatsimiititaliat marluk siorna maajimi atuutilermata Qaasuitsup Kommuniata avinneqarnissaanik sulineq aallartivippoq.
Sulineq aporfeqaraluartoq naammassisaqarfiusoq
Avannaata Kommunia Kommuni Qeqertallillu piviusunngortinniarneri ajornanngitsuinnaasimanngilaq.
Qaasuitsup Kommuniani qitiusumi allaffeqarfimmeersut kommuninngortussanut marlunnut agguataarneqarnerat novembarimi aaqqiagiinngissutaavoq, tassami Avannaata Kommuniata Qeqertalimmut nuukkusunngitsut Ilulissani atorfinitsippai.
Tamannalu Qeqertalimmi borgmesterip Ane Hansenip pakatsissutigaa oqaatigalugu isumaqatigiissut malinneqarsimanngitsoq.
AAMMA ATUARUK Palle Jerimiassenip Ane Hansen isornartorsioraa
Kommunngortulli taakku marluk piareerluinnaqqissaartut, borgmesterit KNR-imut maanna oqarput.
Avannaata Kommuniata atorfiit 94-it inuttalereerpai, ilaatigulli inuussutissarsiornermut isumaginninnermullu pisortat taavalu aamma aningaasaqarnermut aqutsisoq suli amigaatigai.
- Kommunaldirektørit pisortaagallartullu taakku ingerlappaat. Taamaammat ulluinnarni ingerlatsinermi
sunniuteqanngilaq.
Atorfiit taakku januaarip ingerlanerani inuttalersorneqariissasut, Palle Jerimiassenip naatsorsuutigaa.
AAMMA ATUARUK Qaasuitsup Kommuniani sulisut uippakajaalersimasut
Kommunip piviusunngortinniarnerata saniatigut suliassat piareersimaffigisimanngisat aamma takkupput. Karrani tassaarsuaqarneranit inuppassuit nunaqarfimminnit qimagutitinneqarput suliassallu qaleriiaalerput.
Sulisullu ilungersunartorsiorsimaqimmata ilaat uippakajaalerput, sulinerli naammassisaqarfiuvoq:
- Kommunit pingasut ataatsikkut sullinnerisa saniatigut Uummammani pisimasoq aamma isumaginikuugamikku. Sulisut napparsimallutik sulinngiffeqartut amerlanerpaartaat sulilereernikuupput suliamillu nalinginnaasumik aallartitsereerlutik, Avannaata Kommuniani borgmesteri Palle Jerimiassen oqarpoq.
