Avannaata aamma Qeqertalik ukiortaamit kommuuninngortussanngortut
Sulisussat pisariaqartinneqartut tamangajaasa pissarsiarereerlugit kommuni piareerluinnalertoq, borgmesterinngortussaq Ane Hansen neriorsuivoq.
- Allaffeqarfiliarput piareerluinnaqqissaarpoq. Massakkut isertersimalereerpugut tamattalu inissikkiartuaarluta, Kommune Qeqertalinngortussami borgmesteri, Ane Hansen oqarpoq.
Qaasuitsup Kommunia ukiortaami marlunngorlugu avinneqarpat Kommune Qeqertalimmi kommunalbestyrelsimi ataatsimiititaliat sisamat atuutilissapput.
Ataatsimiititaliat Inuit, Timi Tarnilu, Inoqarfik Inualu inuttalersorneqareerput sulinissarlu aallartissinnaanngorpoq.
Aqutseriaasissaq piareertoq
Kommunimimi aqutseriaasissamik pilersaarusiaq piareeqqasoq, borgmesterinngortussaq oqarpoq.
- Piareersimavugut. Piareersaatit sukumiisorujussuarmik ingerlannikuuagut, ukiup affaa kingulleq ulaperujussuarnikuuvugut, massakkullu tunngaviusumik aallartiffissagut tamarmik piareersimalerput, tassalu ukioq aallarteriaannanngorlugu, Ane Hansen oqarpoq.
Ane Hansenip atorfinni amerlanerpaamik 50-iusussani aqqanillit suli sulisussarsineqanngitsut novembarimi ilisimatitsissutigaa. Maannali tamakkerluinnalertut, borgmesterissap erseqqissaatigaa.
Kommunimimi isumaginnitoqarfimmi ataqatigiissaarisumik ataatsimik atorfinitsitsereerput, aammali marlunnik allanik atorfinitsitserusullutik.
- Kivitassaq annertummat aamma pingaaruteqarmat pitsaasumik kivinneqarnissaa. Soorlu meeqqanik isumaginninneq innarluutilinnillu isumaginninneq eqqarsaatigalugit, inatsisitigut sukateriffigineqarnikuusut, immikkut ittumik iliuuseqarfigerusukkatsigit, borgmesterinngortussaq oqarpoq.
Avataanit ikiorsiisoqartoq
Kommunip piviusunngortinniarnerani avataanit ikiorneqarnissaq pisariaqarsimaqisoq, borgmesterinngulersup Ane Hansenip oqaatigaa. Taamaammat Kommuneqarfik Sermersooq saaffigineqarpoq.
- Kommuneqarfik Sermersooq assorujussuaq qutsavissaqarfigaarput. Kommunimit siunnersuillutillu ikiormatigut, ingammik aningaasarsiaqartitsinerup naqqaninngaanniit ilusilersorlugu naammassinissaata tungaanut, Kommune Qeqertalinngortussami borgmesteri, Ane Hansen, taama oqarpoq.
Kommunit avinneqarpata nittartakkat ukiortaamit atulertussat tassaapput:
avannaata.gl
qeqertalik.gl
