Suliffeqarfik akiliisinnaajunnaartoq: Imermik nunatsinneersumik Kinamut nioqqutissiulersaarsimagaluartoq
Nilammit Qeqertarsuup Tunuaneersumit immiamik Kinamut tunisartagassaminik nioqqutissiulerniarluni, suliffeqarfik Arctic Ice Cap Waterimik ateqaqqaariarluni Iluimermik kingorna ateqalersimasoq 2017-imi nalunaarpoq.
Avammulli tunisaqarujussuartalernissamik pilersaarnera qatangiinnarpoq, massakkullu akiliisinnaajunnaarluni. Tamanna nittartakkami konkurser.dk-mi takuneqarsinnaasoq, Sermitsiaq.ag allappoq. Suliffeqarfik taanna akiliisinnaajunnartutut marsip ulluisa 24-anni nalunaarutigineqarpoq.
Suliamik taassuminnga suliarinnittoq eqqartuussissuserisutut suliffeqafik, Malling & Hansen Damm, naapertorlugu Iluimeq pisussaaffimmisut ukiumoortumik naatsorsuusiortarsimanngilaq.
AAMMA ATUARUK Arctic Ice Cap nunanut allanut tunisassiulersinnaassaaq
Suliffeqarfik taanna nilammit Qeqertarsuup Tunuaneersumit immiamik maqitigassamik Danmarkimut assartuinissaminut akuerineqarsimasuuvoq.
Iluimeq Kinami minguitsumik imissaalatsisoqarmat, imermik naalagaaffiit inuttunersaannut tunisaqarujussuartalernissaminik ilimasussimagaluarpoq.
Suliffeqarfiulli pisortarisimasaa imermik nioqqutissiamik tuniniaanermik aallussinini suliffeqarfimmi nutaami nangippaa.
- Greenland Ice Cap nilammit immiamik Ilulissani maqitigassamik pisinnaatitaanissamik Greenland Water Bottling sinnerlugu qinnuteqartoq, Peder Pedersen Sermitsiaq.ag-imut allappoq.
