Naalakkersuisut partiillu akornanni isumaqatigiissut nutaaq: Suliffeqarfiit sisamat uku marlunngungajalerput

Namminersorlutik Oqartussat aktianik piginneqatigiiffiutaat sisamat marlunngorlugit kattunneqarnissaat sulissutigineqarlunilu misissuiffigeqqissaarneqassaaq.

Namminersorlutik Oqartussat aktianik piginneqatigiiffiinut piginnittuunermut politikki pillugu Naalakkersuisut partiillu isumaqatigiissuteqartut sisamat nutaamik isumaqatigiissuteqarnerisa kingorna tamanna nalunaarutigineqarpoq.

Isumaqatigiissut naapertorlugu suliffeqarfiit INI A/S-ip aamma Illuut A/S-ip kattunneqarnissaasa sulissutigineqarnissaa isumaqatigiissutigaat.

Tamatuma saniatigut Royal Arctic Line A/S aamma Sikuki Nuuk Harbour A/S ‘ingerlatseqatigiiffiit ataasiakkaat qitiusumik suliaasa, pissutsillu atuuttut allat misissoqqissaarneqarnerisigut’ kattunneqassapput.

Suliffeqarfiilli sisamat kattutinnginnerminni paasiniaanermi tunngavioqqaassasut, Illuut A/S-imi pisortaaneq, Torben Pauls nassuiaavoq kattussisoqarnissaa pillugu marlunngornermi tusagassiortunik katersortitsisoqarnerani aatsaat tusarsimallugu:

- Tusariinngilarput. Tusagassiortunik katersortitsisoqarnissaanut minutsit 15-it sioqqullugit mailimik tigusaqarpugut.

Qanoq eqqarsaateqarfigaasiuk?

- Eqqarsaatiginngilarput. Politikerit politikkissaminnik suliaqarnissaminnut eqqissisimatinneqarusuttut eqqarsarpunga. Tamanna eqqumiitsutut isiginngilara.

Tamanna qanoq isumaqassava? Tiguneqassavisi imaluunnit assingusumik?

- Tamanna arlaatigut ilisimasaqarfiginngilara. Qanoq ingerlanissaanik eqqarsartoqarnersoq imaluunniit qanoq isumaliuteqartoqarnersoq ilisimasaqarfiginngilara. Misissueqqissaartoqarniartoq allassimavoq. Misissuinermi peqataanngilagut. Arlaatigut aperineqarnikuunngilagut, taanna KNR-imut oqarpoq.

Illuut tatiginassuseqartumik sulisoq

Torben Paulsilli Illuut A/S-ip INI A/S-illu kattunniarneqarnerat naalakkersuisut ineqarnermut politimik ingerlatsiniarnerannut ilaasoraa.

- Siulersuisutta piginnittut isumaat malillugu periusissiaat aallaavigalugu sulivugut. Piginnittormi siulersuisunik toqqaasarpoq. Periusissiamik nutaamik kattunneqarnissatsinnik oqaaseqartumik peqalerpat tamanna tatiginassuseqartumik soorunami sulissutigissavarput Torben Pauls KNR-imut oqarpoq.

Illuut A/S-ip pisortaanerata suliffeqarfiit marluk kattunneqarnerat Illuut A/S-imut iluaqutaassanersoq ajoqutaassanersorluunniiit akuliuffigerusunngilaa.

- Soorunami INI A/S-ip ingerlanneqarnera pillugu kisitsit iserfigalugit takusinnaavakka ajoriffissaqartinnagillu eqqarsarlunga. Illuut A/S-imi inissiiatitsinnik ingerlatsilluarpugut.

INI A/S-imut sanilliullugu?

- Aap, isumaqarpunga taamaattugut. Kisianni soorunami sanilliukkuminaappoq.

Illuatungeriit isumaqatigiissuteqartut isumaqatigiissummi ima allapput:

- Inuiaqatigiinni ineriartorneq patsisigalugu ingerlatseqatigiiffiup pingaarnertut siunertai imaluunniit niuernerup ilaa inuiaqatigiinnut naleqqukkunnaarsimappata, politikkikkulluunniit aalajangiisoqartillugu, pisoq aallaavigilluinnarlugu misissueqqissaarneq tunuliaqutaralugu suliniutit arlallit aallartinneqarsinnaapput.

Isumaqatigiissut naapertorlugu suliniutit tassaasinnaapput atorunnaarsitsineq, ingerlatseqatigiiffimmut allamut kattunneq, namminersortunngortitsineq imaluunniit kiffartuussinissamik isumaqatigiissutinik naliliineq.

Naalakkersuisut partiillu isumaqatigiissuteqartut sinnerisa suliffeqarfiit sisamat sooq kattunneqarnissaa aalajangersimasumik paasissutissiissutiginngilaat.

KNR-ip suliffeqarfiit sinneri pingasut oqaaseqartinniarsarigaluarpai. Royal Arctic Line A/S aamma Sikuki Nuuk Harbour A/S oqaaseqarusunngillat. INI A/S saaffiginnissummut suli uterfiginninngilaq.