Suliffeqanngitsut aatsaat taama ikitsigisut: Aningaasaqarneq siumukariartorpoq

Kalaallit suliassaqarluarput. Suliassammi siusinnerusumit amerlanerupput.

Nunatsinni naatsorsueqqissaartarfiup suliffeqanngitsut siornamut sanilliullugit 15,6 procentimik ikileriarsimasut nalunaarsorpai. Tassa imaappoq nunatsinni maanna suliffissarsiortut 1261-iinnaapput.

Suliffissarsiortutut nalunaarsorneqartut ukiup ingerlanerani allanngorartaraluartut ukiullu ilaannaani sulisartut amerlagaluartut, amerlasuullu upernaakkut suleqqilertarluartut una immikkut maluginiagassaasoq, Sulisitsisut pisortaat, Christian Keldsen oqarpoq – taannali tupaallanngilaq. Nunatsinnimi aningaasarsiorluartoqarpoq.

- Suliffeqanngitsut taama ikitsiginerat tupaallaatiginngilara, sulisussarsiortoqangaatsiarpormi. Tamanna ilinniarsimasunut ilinniarsimanngitsunullu atuuppoq. Ukiut ingerlaneranni 16 procentimik apparnerat aningaasaqarnerup ingeralluarneranut takussutissaavoq. Tamanna nunatsinni aamma takuarput. Siumukariartortoqarpoq, taanna oqarpoq, nangillunilu:

- Aningaasaqarneq siuariartoraangat sulisussat amerlanerusut aamma pisariaqartinneqartarput. Tamannalu sulisoqarnerutitsilernera uannut tupaallannanngilaq.

Aningaasaqarneq avinngarusimasoq

Naalli suliffeqanngitsukinnera tupaallaatiginngikkaluiarlugu nunatta aningaasaqarnerani taama suli siuariartortoqartiginera tupaallaatigilaarpaa. Nunarsuummi sinnerani aningaasaqarneq unittooqqangaatsiarpoq:

- Arajutsineqarsinnaanngilaq, pissutigalugu COVID19-ip kingorna sulisussat pisariaqartinneqangaatsiartut takuarput, aamma nunarsuarmi sumiiffinni arlalinni appariartoqarnissaa naatsorsuutigineqangaatsiarpoq. Assersuutigalugumi Danmarkimi sanaartornermi soraarsitsiortortoqangaatsiarpoq. Tamannali nunatsinni taama eqquinngilaq. Suli ingerlarsortoqarpoq.

Nunatta avinngarusimangaatsiarnera nassuiaatit ilarujussuaniippoq. Nunarsuarmi qeqertat immikkoortoq. Nunatta aningaasaqarnera aamma taamatut avingarusimangaatsiarpoq, nunarsuarmilu niuernermitulli sunniivigineqarnani:

- Aningaasaqarnermi matumani ilusilersorneqarnerani iluaqutaa tassaavoq nunarsuarmi appariartoraangat taama annerutigisumik malinnaaneq ajoratta. Ammali muminganik qaffakkiartornerani sukkassusaatulli aamma malinnaaneq ajorpugut. Taamammat allanngoranngitsorujussuullunilu siunissamut isigisinnavugut.

Atortulersuutinut aningaasaliineq siuariartornissamut aqqutissiuussisoq

Taassuma mittarfinnik sanaartungaatsiarnerit, takornariaqarnermi siuariartortoqarnera soorunamilu – aalisarneq nunatta ukiuni makkuani ingerlalluangaatsiarneranut nassuiaatissaanerusut oqaatigai.

- Atortulersuutinut suliniuterujussuit nunatta aningaasaqarneranut isumaqangaatsiarput. Aningaasaliinerit ilaat suliniutillu angiusuut sunniuteqarneranni nunatta aningaasaqarnerani ingerlalluartoqarpoq, ingerlalluaannartoqarnissaalu aamma naatsorsuutigaarput.

Taamaammat anignaasaliinerit pisortaniitsiinnarnissaat pingaaruteqartoq taassuma aamma erseqqissaatigaa. Taakkuinnaammi ingerlalluartoqarneranut kisimiillutik aqqutissiuussinngillat. Pisortanit aningaasartuutit qaffakkiartortut matussuserneqarnissaanut aamma pisariaqartuupput:

- Pisortat namminersortullu aningaasaliinerannit sunniutigissaartoqarpoq, aningaasaqarnermi ingerlarsortippaat. Kisianni sipaarniarnermi unittoortoqarpat tamanna sunniuteqarnerlussaaq, taanna oqarpoq, nangillunilu:

- Taamaammat ukiut qulit aqqaneq-marlullu qaangiuppata milliardit koruuninik amigaateqalernissatsinnut aaqqiisseqqinneqannginnerput ilungersunartumik tigussavarput.