Nunatsinni sulisussaqarnikkut 1100-t missaat amigaataasut

Nunatsinni sulisitsisut kattuffiat, GE, nunatsinni suliffeqarfiit sulisussaaleqisarneri ukiumilu nutaami sulisoqarnikkut qanoq inisissimanissartik pillugu qanoq naatsorsuuteqarnerat pillugit ukiut tamaasa nalunaarusiortarpoq.

Tassanilu ilinniarsimasunik sulisussaaleqinerup ukioq manna unamminartunngorsinnaanera tikkuarneqarpoq. 

2022-mi nalunaarsukkat misissuinermi najoqqutarineqarput, nunatsinnilu suliffeqarfiit ataatsimut isigalugu 1100-t missaannik maanna sulisussaaleqisut misissuinermi erserpoq. Nunatsinnili suliffeqarfiit ilaannaat misissuinermi peqataammata, sulisussaqarnikkut amigaataasut amerlanerussangatinneqarput.

Nunatsinni sanaartornermi, aalisarnermi, niuernermi takornariaqarnermilu kalaallinik sulisussarsiortoqarnerunissaa ilimanartoq tamannali inuiaqatigiinni ineriartornerup ingerlalluarneranik aamma ersersitsisoq, Sulisitsisut tusagassiuutinut nalunaarput. 

Sulisussarsiornerli unamminarsinnaassaaq. 

Nunanit allaneersunik sulisoqarneq

Nunanit allaneersunik sulisoqarneq, Sulisitsisut nalunaarusiaminni aamma eqqaavaat. Nunatsinni sulisut 11 procentiisa missaat nunanit allaneersuusut, nunatsinni aningaasaqarneq pillugu siunnersuisoqatigiit ilisimatitsipput. Assersuutigalugulu Skandinaviami sulisuni nunanit allaneersut aamma 11 procentit missilioraat, ilanngullugu ilisimatitsissutigaat.

Nunatsinni nunami allamiut aatsaat taama amerlatigisut, novembarimi allaaseraarput.

Inatsisartunilu tamanna pillugu isummat assigiinngeqaat.

Tassami Siumup Naleqqallu nunanit allaneersunik tikisitsilluni sulisoqarneq akuersaannginnerusutut ikkaat, Inuit Ataqatigiit Atassullu akuersaarnerusutut ippaat. 

AAMMA ATUARUK Nunanit allaneersut nunatsinniittut pillugit Inatsisartuni isummat assigiinngitsut

- Sulisunik atorfissaqartitsinitsinni iluaqutaaneri qujanarpoq, IA-p politikkikkut oqaaseqartartua Agathe Fontain oqarpoq.

Nunanilli allaneersunik sulisoqarneq nunatta aningaasarsiorluarneranik ersiutaasoq sulisullu nunanit allaneersut nunaqavissut piginnaasaasa saniatigut allanik piginnaasatigut pissarsiffiusartut, Sulisitsisut aamma isumaqarput.