Nunatsinni nunami allamiut aatsaat taama amerlatigisut
Pisiniarfiliaruit, neriniartarfimmiikkuit akunnittarfimmiikkuilluunniit sulisoq kalaallisut danskisulluunniit oqalunngitsoq tuluttuinnarli oqaluttoq naammattuussavat.
Tamannalumi tupinnanngilaq, naatsorsueqqissaartarfiummi kisitsisaatai naapertorlugit, nunami allamiut nunatsinniittut aatsaat taama amerlatigilersimapput.
Ukiullu tallimat kingumut qiviaraanni tassa 2017-mi kisitsisit naapertorlugit nunami allamiut nunatsinniittut katillutik 1.017-iupput.
Kisitsillu taanna ullumikkut marloriaatinngorsimavoq, maannami nunami allamiut naalagaaffeqatigiinnerup iluani innuttaasuungitsut nunatsinniittut 1.860-iupput.
Kangiamiorpassuanngortut
Kisitsisillu sukumiinerusumik misissoraanni nunami allamiut pineqartut nunatsinnilu akissarsiorusuttut kangiamiuunerusarput.
2017-ip aallartinnera tunngavigigaanni kangiamiut nunatsinniittut katillugit 391-iupput. Kangiamiutut innuttaassuseqartut ullumikkut 291 procentimik amerlillutik manna 1.139-nik amerlassuseqarput.
Naatsorsueqqissaartarfiullu kisitsisaatai naapertorlugit kangiamiuni tamani Filipinerit amerlanerpaapput, Thailandimiut amerlanerpaanut tulliullutik Kinamiullu pingajuanni inissisimallutik.
- 486-it Filippinerinit
- 249-t Thailandimit
- 128-t Islandimit
- 80-it Kinamit
- 80-it Polenimit
Paasissutissarsiffik: Naatsorsueqqissaartarfik
Kisitsisit 2017-imeersut qimerlooraanni nunatsinni nunasisuni europamiut amerlanerpaapput. Taamani naalagaaffeqatigiinni innuttaassuseqanngitsut 560-it nunatsinni nunasisimapput.
Europamiut nunanit allamiut nunatsinni nunasisimasuni amerlanerpaanut tulliupput. Europamiusut innuttaassuseqartut matumani danskisut savalimmiormiutullu innuttaassuseqartut minillugit katillugit 688-iupput.
Europamiut ukiuni kingullerni tallimani 20 procentit sinnilaarlugit amerleriarsimapput.
Nunanit allamiut nunatsinni tamarmiittut
Nunani allamiutut innuttaassuseqartunit 1.860-init 61 procentii illoqarfiit pingaarnersaanni najugaqarput, sinneri nunatsinni tamarmi siammartersimapput.
2017-imi nunami allamiutut innuttaassuseqartut 1.017-it nunatsinniipput, taamanilu taakku illoqarfiit pingaarnersaanni katersuunnerusimallutik. Taamanilu 64 procentii Nuummi najugaqarput.
Naallu ukiuni kingullerni nunatsinnut nuuttorpassuugaluartut illoqarfiit pingaarnersaannut taamaallaat noorartoqanngilaq.
Nunasisummi illoqarfissuarmut kisimi katersuunnatik nuna tamakkerlugu siammartersimapput.