Suiaassuseqatigiillutik atoqateqartartut akueraat
Savalimmiuni ullaap tungaani Lagting-imi ilaasortat amerlanerussuteqalaarlutik suiaassuseqatigiillutik atoqatigiittartut nikassarneqannginnissaannik inatsisissaq pingajussaaneerlugu inaarpaat.
Lagtingemi ilaasortat katillutik 32-isut akornganni 17-t inatsisissamut akuersipput akerliusullu 15-iullutik.
Tassalu imaappoq nunat Europami avannarlerniittut inatsisaat assigalugu tassalu ammit qalipaataannik assigiinngisitsisoqannginnissamik taamalu kinguaassiutitigut atoqatigiittarnermi immikkuullarissuuneq tunngavigalugu immikkoortitsisoqannginnissamik imaqartoq paragraffi Savalimmiuni aamma atorneqartussanngorpoq.
Oqaluttuarineqarporlu inatsisissamut tassunga akuersaanngitsut piumarisimagaluaraat inatsimmi tassani suiaassuseqatigiillutik atoqateqartartut immikkut eqqaaneqartariaqanngitsut.
Naaggaartullu Savalimmiuniit folketingimi ilaasortaatitaasoq Anfinn Kallsberg oqaaseqartoralugu anguniarsimagaluarpaat inatsimmi tassani oqaaseqatigiit atorneqartut oqaaseq suiaassuseqatigiillutik atoqateqartarneq atornagu allanngulaaginnarneqarsinnaagaluartoq inuit minnerussuteqartumik inissisimasut pineqarnerat oqaaseqatigiit iluanni ersersittussanngorlugu taamaalillugu taamatut atoqatigiittartut immikkut taakkartunngikkaluarlugit ataatsimoortumik inatsisiliortoqarsinnaasorigamikku.
Maannali tassa inatsit suiaassuseqatigiillutik atoqateqartartut illersorneqarnissaannik imaqartoq amerlanerussuteqartut akuersaarnerisigut Savalimmiuni atuutilertussanngorpoq.
