Sudanimi tuluit ilaqutariit meerartallit utoqqaallu sakkutuut timmisartuinik aaneqassasut
Tuluit Sudanimi najugallit qimagussortinniarlugit Tuluit Nunaanniit aaneqarput, ullumilu marlunngornermi ullaap tungaani aallarartinneqassapput. Nutaarsiassaqartitsivik Reuters taama nalunaarpoq.
Sakkutuut timmisartuinik tuluit Sudanimiittut Sudanip illoqarfiisa pingaarnersaanniit Khartoumimiit aallassasut oqaatigineqarpoq.
Aallartullu siulliit ilaqutariiussapput meerartallit aammalu utoqqaat inuillu peqqissutsimikkut ajornartorsiutillit.
Tuluit Nunanut allanut ministereqarfiata erseqqissaatigaa, aallartussat timmisartoqarfiliarnissamut kalerrinneqarunik aatsaaat timmisartoqarfiliassasut.
Tuluillu nutaarsiassaqartitsiviat Sky News naapertorlugu, tuluit Afrikap avannaani Sudanimi najugallit 4000-t missaanniipput.
Sudanimi sakkutuut aammalu sakkutuujunatik sakkulisartut RSF-mik taaguutillit aprilip 15-ianili aaqqiagiinngilerput, illoqarfimmilu Khartoumimi qaartartumeerisoqaqattaarlunilu eqqaasserujussuaqattaarfioqaaq.
Oqaatigineqarporlu inuit 400-nit amerlanerusut akersuuttoqarnerani toqutaasimasut.
