Nanoq Beer akileraarutitigut akiitsorpassuaqartoq

Tamanna Aqqaluaq B. Egedep paragraf 37 atorlugu apeqqutaanut akissummi atuarneqarsinnaavoq.

Immiorfiusimasoq akiliisinnaajunnarsimasoq akileraarutinut akitsuutinullu 180.000 koruuningajannik akiitsoqarpoq. Taakkua saniatigut 24.000 koruunit imermik nunanut allanut tunisinermi Royaltiesit akilersimanngilai.

Tamatuma saniatigut Akileraartarnermut Aqutsisoqarfiup akiliisinnaajunnaartut pigisaannik misissuinermi paasisimavaa, piginneqatigiiffik akitsuutinik ikinnerpaamik 120.000 koruuninik akiliingitsoorsimasoq. Taakkuali kingusinaarneq peqqutigalugu akiliisinnaajunnartumik suliarinittumut nalunaarutigineqarsimanngillat.

Aamma atuaruk Imigassanut akitsuut Nanoq Beerimit akilerneqarsimanngilaq

Aamma atuaruk Kukkunersiuisoq: Nanoq Beerip naatsorsuutinik tunniussisimannginnera eqqumiilluinnarpoq

Suliami tassani akisussaatitsinissamut tunngavissaqarsinnaanersoq Akileraartarnermut Aqutsisoqarfiup isumaliutersuutigisimallugu ilisimatitsissutigaa, tassalu piginnittuni aningaasaliinerpaat akiliisussanngortinniarneqarnissaat eqqarsaataasimalluni. Kisianni nukinnik atuinissaq paasissutissallu pigilikkat pissutigalugit taamaatitsiinnarsimapput. 

Piginneqatigiiffik akiliisinnaajunnaanngikkallarami borgmesterimit Siumullu siulittaasuata tullianit Jørgen Wæver Johansenimit Inatsisartunilu ilaasortaasimasumit Gerhardt Petersenimit siuttuffigineqartoq, tassa 320.000 koruuninik akileraarutitigut akitsuutitigullu akilinngitsuukkatigut inuiaqatigiinnut akiitsoqarput.

Aammali tamaasa isigigaanni Nanoq Beer pisortanut akisusimavoq. Tassami Namminersorlutik Oqartussat aningaasaliisarfiat, Greenland Venture, 1.298.000 koruuninik piginneqataassutitut taarsigassarsiatullu aningaasaliisimavoq. 

Tassalu immiorfimmut iluatsinngitsoortumut inuiaqatigiit 1.620.000 koruuninik aningaasartorput.