URANI Steen Lyngep siunnersuutini tunuartippaa
- Partiimi siulittaasutta innuttaasut taasitinneqarnissaannik isumaq tapersersunngilaa, taamaattumik aamma ataqqillugu, taavalu partiit naalakkersuisoqatigiinni suleqatitta tamanna tapersersunngimmassuk, inuiaqatigiit toqqissisimanissaat angorusukkakku qaffasinnerpaamik killiliinissaq massakkut aqqutissiukkusuppara, Steen Lynge oqarpoq.
Uranimik piiaasoqassanersoq pillugu innuttaasut taasitinneqarnissaat Steen Lyngep paragraf 37 atorlugu Naalakkersuisunut apeqquteqaateqarami, tamatuma qineqqusaarutigisimanera tunngavilersuutigaa.
Aamma atuaruk Urani pillugu taasisitsisoqassanersoq apeqqutigineqarpoq
Tamannalu partiinut illuatungiliuttunut Inuit Ataqatigiinnut aamma Partii Naleqqamut neriullualertitsigaluarpoq.
Kisianni partiit naalakkersuisoqatigiit allamik isumaqartut sisamanngornermi ataatsimiinneranni ersermat Steen Lynge allamik anguniagaqalerluni oqarpoq.
Tassalu aatsitassat uranimik qanoq akoqartigisinnaanerannik killiliinissamut innuttaasut taasissutiginissaat Steen Lyngep maanna anguniarnialerlugu oqarpoq.
Aamma atuaruk Steen Lynge: Uranimut naaggaarluinnarneq taasissutigineqassanngilaq
Tamannali isumassarsiatsialaanngitsoq, Inuit Ataqatigiit siulittaasuat, Sara Olsvig isumaqarpoq.
- Apeqqut una teksniskiusorujussuanngortinnaveersaarlugu tunngaviusumik naleqartitatut eqqartorneqartariaqartoq, politikkikkullu Naalakkersuisunit partiiniillu tamanit isummerfigineqartariaqartoq isumaqarpunga, aammalu inuiaat taasitinnerisigut innuttaasut isummerfigisariaqagaat, Sara Olsvig oqarpoq.
Aamma atuaruk Uranitallit pillugit taasisitsinissamik kissaateqarneq akerliunerlu
Per Rosing-Petersen Partii Naleqqameersoq Steen Lyngep anguniagaanut nutaamut oqaaseqarusunngilaq, oqaatigeriikkaminullu innersuussilluni.
Taanna siornatigut oqarpoq, Atassut Inatsisartut upernaakkut ataatsimiinneranni uranimik qalluinissaq pillugu aalajangiiffigisassatut siunnersuummik saqqummiussinngikkuni, politikikkut tatiginassutsi tamaat annaassagaa.
Aamma atuaruk Partii Naleraq: Atassut aalajangiiffigisassatut siunnersuuteqartariaqarpoq
Atassutip siulittaasua, Knud Kristiansen suliamut oqaaseqarusunngilaq.
Aamma atuaruk Urani pillugu innuttaasunik taasititsiniartoqarnera Avatap nuannaarutigaa