Partii Naleraq: Atassut aalajangiiffigisassatut siunnersuuteqartariaqarpoq
Partii Naleraq sinnerlugu Inatsisartunut ilaasortaq Per Rosing-Petersen, Steen Lyngep Atassummeersup ulluni kingullerni inuiaat kalaallit uranimik qalluinissaq pillugu apeqqummi tusarniarneqartariaqarnerannik saqqummiussereersoq, taama isumaqarpoq.
- Arlaannik oqaaseqaraanni aamma tamanna malitseqartinneqartariaqarpoq. Taamaammallu Atassutip saqqummiussani attatissagaa qularinngilara, taama Per Rosing-Petersen Partii Naleqqameersoq, inuiaqatigiit uranimik qalluinissaq pillugu taasitinneqarnissaannik aamma kissaateqartoq, oqarpoq.
Læs også Urani pillugu taasisitsisoqassanersoq apeqqutigineqarpoq
Atassutip siulittaasuata tulliata Steen Lyngep paragraf 37 naapertorlugu innuttaasut apeqqut pillugu taasitinneqarnissaata qanoq akeqarnissaanik naalakkersuisunut apeqquteqareersoq, innuttaasut taasitinneqarnissaannik apeqqut oqallisaaqqilerpoq. Steen Lyngep Atassutip innuttaasut taasitinneqarnissaannik qineqqusaarnermi neriorsuutaa tunngavilersuutimini innersuussutigaa.
Inuit Ataqatigiit uranimik qalluisoqarnissaa kissaatiginngilaat, partiilli innuttaasut taasitinneqarnissaat kissaatigaat. Naallu siunnersuummik tigussaasumik suli saqqummiussisoqanngikkaluartoq, taamaattoq siulittaasup Sara Olsvigip Atassutip oqariartuutaa nuannaarutigaa.
- Tamat oqartussaaqataanerata pitsaasumik qulakkeernissaanut, apeqqummilu taamak pingaaruteqartigisumi innuttaasut pisariaqartumik akuliutsinneqarnissaannut maanna periarfissaqarlualerluta isumaqarpunga.
Marlunngormallu aatsitassanut akisussaanerpaasoq - naalakkersuisoq Randi Vestergaard Evaldsen, Demokraatineersoq, inunnik taasisitsisarnermik periuseqartarneq qaangiutereersoq, aatsitassallu qallorneqartut uranimik akoqanngilluinnarnissaannik piumasaqaat 2013-imi atorunnaarsinneqartoq, taamatullu Kalaallillu Nunaat utimut alloriaqqilluni innuttaasunik taasisitsissaguni, tatigineqarnerminik annaasaqassasoq Qanoruumut oqarpoq.
Aamma atuaruk VIDEO Randi: Urani pillugu isumaqatigiissut pingaartorujussuuvoq
Per Rosing-Petersenilli tamanna aarlerinartoqartinngilaa, taassumami isumaa naapertorlugu innuttaasunik taasisitsineq pisumik qulaajaasussaaq.
Apeqqut aalassaataasoq pineqartillugu qulakkeerinissaq pingaaruteqartorujussuuvoq. Tamanna nunarput pillugu, aammali aatsitassarsiortut ujarlerlutillu qalluisussat pillugit.
Aamma atuaruk Ilisimatooq: Uranimik tuniniaalinnginnermi suliassarpassuaqarpoq
Sara Olsvigilu aamma taama isumaqarpoq.
- Innuttaasut taasitinneqarnerisigut politikip ingerlanneqartup innuttaasut isumaannik toqqammaveqarneranik qulakkeerinikkut patajaatsumik ingerlatsinissamut maanna periarfissaqalerpugut.
KNR-ip Atassutip siulittaasuata tullia Steen Lynge, Aatsitassanullu ataatsimiititaliap siulittaasua Jens-Erik Kirkegaard Siumumeersoq oqaaseqartinniarlugit pissarsiariniaraluarpai, taakkuli Radioaviisip saaffiginninneranut qisuarianngillat.
