Politikki

URAN Steen Lynge: Uranimut naaggaarluinnarneq taasissutigineqassanngilaq

Uranimik piiasoqartinnagu innuttaasut taasitinneqaqqaarnissaat Atassummit qineqqusaarutigineqartoq, innuttaasut taasitinneqarnissaat pillugu Steen Lyngep sapaatip akunnerata siuliani apeqquteqarnermini tunngavilersuutigaa. Uranimilli piiaanissaq pillugu taasititsisoqassanngitsoq, Steen Lynge maanna oqarpoq.

Allattoq Ivik Kristiansen, Thomas Munk Veirum

februaarip 12-at 2016 14:06

Innuttaasut uranimik piianissamut unitsitsisinnaanissaannut Steen Lyngep periarfissikkusunngilai.

Kisianni aatsitassat uranimik qanoq akoqartigisut piiarneqarsinnaassanersut innuttaasut isummerfigissagaat kissaatigalugu. Atassutip siulittaasuata tullia maanna taama oqarpoq.

Steen Lynge uran pillugu innuttaasut taasitinneqarnissaat qanoq akeqassanersoq sapaatip akunnerata siuliani paragraf 37 atorlugu apeqquteqarami tupaallatsitsivoq.

Apeqquteqaateqarneralu partiinut illuatungiliuttunut, Inuit Ataqatigiinnut aamma Partii Naleqqamut neriuuteqalersitsivoq. Tassami partiit taakku marluk uranimik piaasoqassanersoq pillugu innuttaasut taasitinneqarnissaat piumasaraat.

Aamma atuaruk Partii Naleraq: Atassut aalajangiiffigisassatut siunnersuuteqartariaqarpoq

Kisianni innuttaasunik taasisititsinissami nunatsinni uranimik piiasoqarsinnaassanera imaluunniit taamaattoqarsinnaassannginnera pineqassanngilluinnarpoq.

- Siullermik erseqqissaassutigilara, Atassumminngaanniit isumarput allanngornikuunngimmat. Tassalu aatsitassarsiornermut atatillugu, qanga atuussimasoq, uranimik akuersinngilluinnarneq Atassumminngaanniit uterfiginiannginnatsigu, Steen Lynge ullut arlallit nipangersimareerluni taama oqarpoq.

Aamma atuaruk Uranitallit pillugit taasisitsinissamik kissaateqarneq akerliunerlu

Steen Lyngep apeqquteqaatimini Atassutip qineqqusaarutaa innersuussutigigaluarpaa.

- Atassut qineqqusaarnermi kingullermi aatsitassanik uran-italinnik piiaanissat aallartinneqarsinnaanerat sioqqullugu innuttaasut taasisitsinikkut tusarneqarnissaat anguniassallugu neriorsuuteqarpoq.Tamannalu piviusunngortinniarlugu Inatsisartuni upernaakkut ataatsimiinnissaannut siunnersuusiornissaq anguniarlugu apeqqut qulaani pineqartoq akineqassasoq kissaatigaat, Steen Lynge apeqquteqarnermini tunngavilersuutimini allappoq.

Innuttaasunilli taasisitsinissamik eqqarsaateqarami, Steen Lynge allamik eqqarsaateqarpoq Naalakkersuisoqatigiit isumaqatigiissutaat maanna innersuussutigaa, Steen Lynge naapertorlugu allassimammat aatsitassat piiaakkat qanoq uraneqartigisut akuerineqarsinnaanera partiit isumaqatigiissutigissagaat.

Aamma atuaruk Urani pillugu innuttaasunik taasititsiniartoqarnera Avatap nuannaarutigaa

- Massakkut apeqqutip qaqilernerani anguniarpara, siunissami aatsitassarsiornermut atatillugu aatsitassat akuisa qaffasinnerpaaffilerneqarnissaanik aalajangersaanissaq ilaatigut eqqartortariaqaratsigu, Steen Lynge oqarpoq.

Aatsitassat piiarneqartut uranimik akoqarpallaanngippata isumannallisaanissamut periutsit allat atorneqartussaassasut, Steen Lynge aamma oqarpoq.