Politikki

VIDEO Uranitallit pillugit taasisitsinissamik kissaateqarneq akerliunerlu

Aatsitassanik uranitalinnik piiaasoqartillugu, ingerlatsisoqartillugu, avammullu tunisisoqartillugu Naalakkersuisut Danmarkimi naalakkersuisullu kia akisussaaffigissaneraa aalajangerpaat. Saniatigullu Inatsisartuni innuttaasunik taasisitsinissaq apersuutigineqarluni.

Allattoq Dorthea Johansen, Camilla Dam

februaarip 11-at 2016 15:27

Nutserisoq Marie-Kathrine Barlaj Lyberth

Innuttaasut Nuummi aqqusinermi naapitatta ilaasa taasisitsinissaq kissaatigaat ilaasalu akerleralugu.

- Naamik, taama isumaqanngilluinnarpunga. Aallartiinnartoqartariaqarpoq. Aningaasanik tuniorartilluni inuuginnartoqarsinnaanngilaq, Evald Simonsen KNR-imut oqarpoq.

Hanne Lundilu isumaqarpoq inuiaqatigiit peqataatinnissaat pingaaruteqartoq.

-Taasisissagunikkit ajornavianngilaq. Inuit isumaat assigiinnginnamik, taava aamma peqataarusututut inuiaqatigiit misigissapput tamatta taasisinneqassagutta. Taavalu immaqa akerliusut ikilissallutik, Hanne Lund KNR-imut oqarpoq.

Naalakkersuisoq: peerneqareersut uterteqqinnagit

Aatsitassanik uranitalinnik piaanerup aallartivinnginnerani innuttaasut tusarniarnissaat pingaaruteqarpoq, Steen Lynge Inatsisartuni ilaasortaq atassummeersoq isumaqarpoq.

Kisiannili taasisitsinissap piviusunngornissaa takorlooruminaatsippara, Randi Vestergaard Evaldsen aatsitassanut naalakkersuisoq oqarpoq.

- Massakkut imatut isikkoqartillugu piviusunngornissaa takorlooruminaappoq. Nultolerance atorunnaarsinneqareerpoq. Taamani aamma Demokraatit soorlu assersuutitalugu killormoortuanik piniaraluarput, taasisitseqqaarlutik, taava nultolerance peerlugu. Massakkut nultolerance peerneqareerpoq. Taava killormut pisoqarsinnaanngilaq. Kalaalli Nunatta uppernanngisumermik taavalu tatiginanngissusermik takutitsissagami, Randi Vestergaard Evaldsen KNR-imut oqarpoq.

Maannakkut taasisitsinissap piviusunngornissaa Naalakkersuisup takorlooruminaatsippaa.

- Naalakkersuisooqatigiit isumaqatigiissutaanni taanna ilaatinneqanngilaq, taamaammat aappissallugu naamiissalluguluunniit oqaatigisinnaanngilara.

- Kisiat ukua massakkut aalajangiunneqareersut pingaarluinnarput suleriuseq ingerlaqqissallugu, Randi Vestergaard Evaldsen aatsitassanut naalakkersuisoq oqarpoq.