Station Nordikkoorluni nunamut isertoqarsinnaalertoq
Ilisimatuut Tunup Avannaarsuanut Villum Research Centerimukartut Svalbardimit qanittumiittumut Station Nordimut ingerlaarsinnaaleqqipput.
Nunanut allanut akuutitsilernissamullu ministereqarfiup, naalakkersuisut kissaataat malillugu, Station Nord, ikaarfissatut akueraat.
Station Nord Schengenimi isumaqatigiissummi ilaanngimmat toqqaannartumik tikissinnaaneq januaarimi mattunneqaraluarpoq.
AAMMA ATUARUK Station Nord killeqarfittut ikaarsaarfittut akuerineqassaaq
Tamanna sioqqullugu nunatta avannaarsuanut angalasussat, assersuutigalugu Tunumi Nerlerit Inaatigoorlutik angalasariaqartarsimapput. Angalanerlu taanna Station Nordikkoornermit akisunerujussuuvoq.
Ikaarfissatulli maanna akuerineqarnera ilisimatuunut tusarluarnartuuvoq, aatsitassarsioqatigiimmi Ironbark Nunatta avannaarsuani Citronenfjordimi suliniarput.
Piumasaqaatit naammassineqassasut
Akuersinermili piumasaqaatit naammassineqaqqaartussat tassaapput;
- Schengenimut killeqarfikkut avallikkoorluni tikinnissamut aallarnissamullu atatillugu nakkutilliinissamut periafissaqarnissaq eqqarsaatigalugu, Naalagaaffimmi politiinit inassuteqarneq malillugu Nunanut allanut akuutitsilernissamullu ministereqarfiup aalajangersagaasa naammassineqarnissaasa isumaginissaanut Station Nord pisussaaffeqarpoq, aatsitassanut suliffeqarnermullu naalakkersuisoqarfik allappoq:
AAMMA ATUARUK Station Nordikkoorluni nunamut isernissamut inerteqquteqarneq isornartorsiorneqartoq
- Suliat ingerlanissaannut tunngasut nakkutilliinermi iliuusissat, Danmarkip Schengenimi suleqatigiinnermi peqataaneranit pisussaatinneqartut, pillugit killeqarfimmi ikaarfissanik atuisunut nalinginnaasumik paasissutissiisarnissaq, Kalaallit Nunaanni Politimesteri suleqatigalugu pisinnaasoq, Station Nordip pisussaaffigaa, naalakkersuisoqarfik allappoq.
Taava aamma Kalaallit Nunaanni Akileraartarnermut Aqutsisoqarfik Station Nordilu suleqatigiillutik sumiiffimmi ilanngaaserinermik suliaqartuussasut, allassimavoq.