Innersuussut: Station Nord killeqarfittut ikaarsaarfittut akuerineqassaaq
Ilisimatuut Tunup Avannaarsuanut Villum Research Centerimukartut ukiortaamiilli Svalbardimit qanittumiittumut Station Nordimut ingerlaarnissamut januaarimi mattunneqarput, naak ukiut arlerlugit tamanna periarfissaasimagaluartoq.
Station Nord Schengenimi isumaqatigiissummi ilaanngimmat toqqaannartumik tikissinnaaneq mattunneqarpoq.
Sermitsiaq.ag allaaserisaqarpoq suleqatigiissitaq kaammattuuteqarsimasoq,
Schengenimi Station Nord isumaqatigiissummi killeqarfittut isigineqalissasoq. Tamannalu ilisimatuunut ilisimatusarfimmiittartunut nutaarsiassatsialaavoq. Aatsitassarsioqatigiimmi Ironbark Nunatta avannaarsuani Citronenfjordimi suliniutimi ammaaniarpoq.
AAMMA ATUARUK Station Nordikkoorluni nunamut isernissamut inerteqquteqarneq isornartorsiorneqartoq
Suleqatigiissitaq oqaluuserineqangaatsiarsimasoq Inatsiseqarnermut ministereqarfimmit pilersinneqarpoq, ukiarmili aaqqiissutissanik suliaqarluni.
- Suleqatigiissitaq aaqqiissutissanik suliaqarsimavoq, tassa Schengenimi isumaqatigiissummi Station Nord killeqarfittut isigineqalissasoq.
Akuersissutip malitsigissavaa Svalbardimit Station Nordimukartoqarsinnaalissammat, tassa Schengenimi isumaqatigiissut malillugu, Illersornissamut ministereqarfik KNR-imut taama ilisimatitsivoq.
AAMMA ATUARUK Missinnaajunnaarsitsineq nunatsinni ilisimatusartoqarneranut aarlerinartitsisoq
Illersornissamut ministereqarfiup naatsorsuutigaa, aasaanerani sulinngiffeqarnissaq sioqqullugu akuersissut inissikkumaartoq.
Arktisk Kommandop politiit suliassaannik suliaqartarput, illersornissaqarfiullu killeqarfimmi nakkutilliineq isumagisassaralugu.
