Station Nordikkoorluni nunamut isernissamut inerteqquteqarneq isornartorsiorneqartoq
Sermitsiaq taama allaaserisaqarpoq.
Passimik politiinut takutitseqqaarani Svalbardimi illoqarfimmit Longyearimit nunatsinnut januaarip aallaqqaataanit angalasoqarsinnaajunnaarpoq. Svalbardip Schengenimi isumaqatigiissummut, nunatta Danmark aqqutigalugu peqataaffigisaanut, ilaannginnera tamatumunnga pissutaavoq.
Taarsiullugulu nunatta avannaarsuanut angalasussat, assersuutigalugu Tunumi Nerlerit Inaatigoorlutik angalasariaqassapput. Angalanerlu taanna Station Nordikkoornermit akisunerujussuuvoq.
AAMMA ATUARUK Missinnaajunnaarsitsineq nunatsinni ilisimatusartoqarneranut aarlerinartitsisoq
Tamannalu ilaatigut Citronen Fjordimi piiaanermik suliniummut Ironbark Zincimut ajornartorsiutaasoq, naalakkersuisoqarfimmi pisortap Jørgen T. Hammeken-Holmip oqaatigaa.
- Iseqqusinnginnermik malittarisassaq ajornartorsiutaavoq. Tamanna Ironbarkimut ajornartorsiuterujussuuvoq. Ajornartorsiullu suli annertunerulerpoq siorna upernaakkut selskabi qallunaat oqartussaasuinut kinguneqanngitsumik qinnuteqaraluarmat 2018-imi aggustimi immikkut akuerineqarluni Svalbardimit Station Nordimut aningaasaliisunik nunanit tamalaaneersunik marloriarluni timmisartuussinissaminut.
AAMMA ATUARUK Staten støtter forskningshub med tre millioner om året
Ilisimatusartut Station Nordikkoorlutik Villum Research Centerimut angalasinnaajunnaarnerat misissuisoqarfimmi ilisimatuussutsikkut pisortamit Henrik Skovimit aamma isornartorsiorneqarpoq.
Suliap Danmarkimi inatsisinik atuutitsinermut ministereqarfimmit oqaaseqarfigineqarnissaa KNR-imit suli utaqqineqarpoq.