MANU Hash Naartullutik hashitortartut taamaatinnissaat tapersersorneqassaaq

Suliniut " MANU Hash "  ineriartortinneqarpoq Peqqissutsimut Naalakkersuisoqarfik aamma Angajoqqaanngornissamut piareersaasarneq - MANU suliffeqarfik namminersortoq ”God Barndom” suleqatigalugu. 

Suliniut MANU hash” tassaavoq ilaqutariinnik meerartaalersunik ilaqutariinngorlaanillu, ikiaroornartumik ajornartorsiuteqartunik atuinerannik unitsitsinissamut tapersersuerpalaartumik,  sulisut kajumissaanissaannut piareersaasussamik atortussanik pikkorissaanissanillu ataatsimoortunik imalik. 

Suliniummi ”MANU hash”-mi  anguniagaavoq, meeqqat kikkulluunniit naartuunerminni alliartornerminnilu ikiaroornartumik sunnerneqannginnissaat.

Naartusoq ikiaroornartumik pujortaraagat, meeraaqqap naartuusup qarasaa sunnerneqartarpoq. 

Tamatuma kingunerisinnavaa meeqqap inuunermi ilaani ilikkariartornissaminut akornuteqarsinnaanera. Ilaqutariinneq meeqqallu alliartornerat akornuserneqarsinnaapput, ikiaroorneq angajoqqaat inuunerannut ilaappat, Peqqissutsimut Naalakkersuisoqarfik tusagassiuutinut nalunaaruteqarluni taama allappoq.

Atortussat tamarmik Christian Rex-imit ilusilersornqarput, soorlu filmiliaaraq titartagaq spotsillu suliarinikuugai, taakku naartunermi meeraarartaqarlunilu ilaqutariinnermi ikiaroornartumik atuinerup kingunerisinnaasaanik ilisimasaqalersitseqataassapput.

- Neriuppunga ilaqutariit meerartaalersut kiisalu ilaqutariinngorlaat, ikiaroornartumik atuisuusut neqeroorummik tapersersuutaasumik matuminnga tigusilluassasut. Meeqqat tamarmik pitsaasumik toqqissisimasumillu peroriartortariaqarput, ikiaroornartumik sunnertisimasunik angajoqqaaqarnatik” Agathe Fontain, Peqqissutsimut Naalakkersuisoq oqarpoq.

Ulluni makkunani ”MANU hash” ernisussiortunut, peqqissaasunut, ilaqutariinnut sullissivinni sulisunut kiisalu Allorfik Nuummi Aasiannilu sulisunut pikkorissartitsissutigineqalereerpoq