Qaartartumeerineq: Sri Lankami toqutaasut suli amerliartortut

Kisitsisit kingulliit naapertorlugit qaartartunik saassussisoqarnerani inuit 290-it toqutaasimasutut nalunaarutigineqarluartut maanna 310-t nalunaarutigineqarput. Saassussinermullu tunngatillugu inuit 40-t maanna tigusarineqartut Sri Lankami politiit nalunaarput.

Sri Lankami oqaluffinni akunnittarfimmilu sapaammi qaartartumik saassussisoqarnerani inuit 310-t toqutaapput.

Qaartitsisoqarnerani inuit aqqunartitersimasut ilarpassui unnuap ingerlanerani toqupput, politiit oqaaseqartartuat ilisimatitsivoq.

AAMMA ATUARUK Sri Lankami arlaleriarluni qaartitsisoqarnerani inuppassuit toqutaasut

Politiip oqarnera naapertorlugu pasisatut tigusarineqartut kingullermi 24-ugaluarput, maannali 40-t tigusarineqarput.

Tigusaasut ilagaat biilini aquttoq, taanna imminut pilliutigaluni qaartartumeereriartutut pasineqarluni tigusaavoq. Pasisaasullu arlallit najugaqarfianni piginnittoq aamma tigusarineqarpoq.

Saassussinermi toqutaasimasut ikinnerpaamik 31-t nunani allaneersut oqartussanit kinaassusersineqarput, sulili ilai maannamut kinaassusersineqanngillat. Taakkunannga pingasut qallunaajupput.