Soraarnerussutisialippassuit qaammammut akissarsiassaqarnerulissasut
Inatsisartut pilersuisussaatitaanerup atorunnaarsinneqarnissaa sisamanngornermi akueraat.
Soraarnerussutisiallit suli sulisumik aappaqartut soraarnerussutisiassaminnik ilanngaanneqartaraluarput. Aalajangiinerli nutaaq pissutigalugu soraarnerussutisiat annertussusissaannut aapparisap isertitai tunngaviusarunnaassapput.
Tamanna 2024-mi januaarip aallaqqaataani atuutilissaaq.
Tamannalu Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisup Jess Svanep nuannaarutigeqaa:
- Nuannaarpugut aamma alloriarnermik siullermik taasinnaasatsinnik nikeriaratta, tassa imaappoq utoqqalinersiutaannarnik utoqqalinersiuteqarnerup ukiui angugukkit isumalluuteqarnissanni inuttut illit aallaavigineqarlutit naatsorsuineq aallartittussanngorpoq, naalakkersuisoq oqarpoq, nangillunilu:
- Massakkut atuuttoq aapparisap sulisup allatulli isertitaqartup, taakku aallaavigineerullutik massakkut inissiisoqarpoq.
Siusinaarluni soraarnerusutisiat qaffasinnerpaat qaammammut akileraarutit suli ilanngaatiginagit 10.000 koruunit missaanniipput, akileraarusereerneranilu ilanngaat nalinginnaasoq atorlugu 8.300 koruunit tiguneqartarput.
Aapparisat suliffeqaruni taakku affapajaavi tunniunneqartarput. Tassa imaappoq qaammammut 5.100 koruunit missaat.
Pilersuisussaatitaanermik atorunnaarsitsisoqarnera soraarnerusutisiallit suli sulisumik aappaqartut ukiortaap kingorna qaammammut 3.000 koruunit missaannik soraarnerussutisiaqarnerulernissaanik isumaqarpoq.
- Naalakkersuisut tunngaviusumik isumaqatigiissumminni anguniagaasa ilaat ullumi piviusunngorpoq. Tamanna Naalakkersuisunut ilaasortat tamarmiulluta nuannaarutigaarput. Sulili pitsanngorsagassaqarpoq, alloriaqattaarpugulli, naalakkersuisut siulittaasuat, Múte B. Egede tusagassiuutinut nalunaarummi oqarpoq.
