Hans Peter Kristensenip aningaasanik amerlanernik pisartagaqalernissi ilimagisinnaagaa

Pilersuisussaatitaaneq Inatsisartuni ukiamut katersuunnermi oqaluuserineqassaaq. Politikerit amerlanerussuteqartut atorunnaarsinniarpaat.

Allattoq Nicole Sander Bertelsen, Nauja Møller

oktobarip 05-at 2023 10:07

Nutserisoq Hans Peter Broberg

Aapparisat sulippat illillu soraarninngorsimaguit, soraarnerussutisiassaq annikinneq pissarsiarissavat. Pilersuisussaatitaaneq tassani peqqutaavoq, aapparpit isertitai soraarnerussutisiarnit ilanngaatigineqartussaammata.

Tamanna taamaateriaannaavoq, tassami pilersuisussaatitaanerup atorunnaarsinnissaa Inatsisartuni ukiamut katersuunnermi oqallisigineqartussaammat.

Nutaarsiassaq, sooraarnermut Hans Peter Kristensenimut, 2015-imili soraarninngorsimasumut, tusarluarnartoq.

- Qiangajappungaluunniit, KNR-imut oqarpoq.

Aamma atuarukNaalakkersuisut utoqqaat pillugit periusissiaq nutaaq saqqummiukkaat: Pilersuisussaatitaaneq atorunnaarsinniarparput

Naak soraarniugaluarluni, nulia suli sulivoq, soraarnerussutisiaanullu tamanna sunniuteqartarpoq.

- Ilaannikkut nererusuttarpugut. Meeraqarpugut erngutaqarlutalu, aamma isumassorusunnerusaraluatsinnik, taamaammat ilaatigut aningaasanik qinusariaqartarpugut. Tamanna ajoqaaq, oqaluttuarpoq.

Aningaasat affaannanngortarput

Annertunerpaamik sioqqutsilluni soraarnerussutisiaqartumut tunniunneqartartoq, akileraarut ilanngaatiginagu, 10.000-it missaaniippoq. Tassa qaammammut 8.300 kronit missaanniittut.

Aappat sulippat, soorlu Hans Peter Kristensenitut, affaasa missaat pissarsiarissavatit. Hans Peter Kristensenimut tunngatillugu 5.100 kronit missaaniittut qaammammut tunniunneqartarput.

- Tamanna naammanngilaq, oqarpoq.

Soraarnerit 4000-init amerlanerusut Hans Peter Kristensenitut nuliatullu atugaqarput.

2022-IMI SORAARNERIT SIOQQUTSILLUTILLU SORAARNERIT AMERLASSUSAAT

2022-imi kalaallit 6.728-it sioqqutsillutik soraarnerupput imaluunniit soraarnerupput aappaqarlutillu sulisumik.

Imatut agguataaqqapput:

4.144 soraarnerit.

2.584 sioqqutsillutik soraarnerit.

Utoqqaat kattuffianni Kattuffik Utoqqaat Nipaanni tamanna ilisimaneqarpoq, pilersuisussaatitaaneq unamminartoqarsinnaasoq.

- Utoqqaat arlallit pilersuisussaatitaanermit eqqorneqartarput, takusareerpagullu aappariit qimattariaqartut, taamaammat nuannaarutigeqaarput, kiisami ajornartorsiut iliuuseqarfiginiarneqarlermat, kattuffiup siulittaasua Kasper Larsen oqarpoq.

2024-imi atuutilissaaq

Pilersuisussaatitaaneq atorunnaarsittuuppat Hans Peter Kristensen allallu soraarnerit sioqqutsillutillu soraarnerit qaammammut 3.000 kroninik pissarsinerusarnissartik ilimagisinnaavaat 1. januar 2024-imiit atuutilersumik.

- Soraarnerussutisiara nuliama isertitaanut attuumassutaaruppat soraarnerussutisiaralu qaffappat, aap, taava nerilluarsinnaalissaanga, immaqalu nakorsiakulajunnaamillunga, Hans Peter Kristensen oqarpoq.

Nunami soraarnerit 2024-imi aningaasanik amerlanerusunik tingusisalissanersut Inatsisartuni 19. oktober aappassaaneerlugu oqallisigineqassaaq.

Nutaarsiassami kukkunermik nassaarsimaguit uunga allaffigineqarsinnaavugut.