Qimmit pillugit suliaq: Eqqussineq politiinut siornatigut suliassanngortinneqareersimavoq
Qeqertarsuarmi qimmit allanertat pillugit suliaq suli ingerlajuarsinnarsinnarpoq.
KNR-imit siornatigut oqaluttuarineqarnikuuvoq Namminersorlutik Oqartussat aasaq manna suliassanngortitsisimasut. Kisianni suliassaq politiinit pisoqalisimasutut nalilerneqarnikuuvoq misissuiffigineqarneralu unitsinneqarluni.
Kisianni maannakkut paasinarsivoq politiinut 2017-imi decembarimili suliassanngortinneqarsimagaluartoq.
SULIAP INGERLANIKUUNERA:
Januar 2018:
- Kalaallit Nunaanni Qimussertartut Kattuffiat, KNQK, pasilliutinik anngussivigineqarpoq.
Oktober 2018:
- KNQK-p Qeqertarsuarmiut Kangerlummiullu pasilliuteqartoqarnera pissutigalugu oktobarip 17-ani 2018-mi Avannaata Qimussersuanut mattummagit suliaq avammut saqqummiunneqarpoq.
November 2018:
- Inatsisartut aalisarnermut piniarnermullu ataatsimiititaliaata taamani aalisarnermut piniarnermullu naalakkersuisuusoq qimmit pasilliutigineqartut DNA-vi misissorneqassasut piumasaraat. Misissuiffigineqalereerpulli.
Marts 2019:
- Kukkuluttuttoqarneratigut DNA-mik misissuineq januarimili piareersimasussaangaluaq kinguarpoq.
Maj 2019:
- DNA-mik misissuineq piareerpoq - inernerali isertuunneqarpoq.
Juni 2019:
- Kommune Qeqertalimmit uppernarsarneqarpoq qimmillip kissaateqarneratigut qimmit pasilliutigineqartut oktobarip 25-ani 2018-imi toqunneqarsimasut.
Juli 2019:
- Aalisanermut piniarnermullu naalakkersuisup uppernarsarpaa innuttaasup suliamut akuusup inatsisitigut innarlitsaaliugaanerata qulakkeerneqarnissaa kiisalu sulianik suliarinnittarnermi pisortat sulianik pineqaatissiissutaasinnaasunik suliaqarneranni tunngaviinut malittarisassat eqqortinneqartussaaneri.
Oktober 2019
- Suliaq eqqartuussivimmut anngunneqassangaluaruni pisoqalereersimassammat politiit suliamik misissuinerminnik unitsitsipput.
- Ilumoorpoq innuttaasunit ilaannit Qeqertarsuarmi qimmerineqaqqusaanngitsunik pasitsaassisoqarluni politiinut 2017-imi saaffiginnittoqarsimammat, Kalaallit Nunaanni Politiini unnerluussisussaatitaasut pisortaat, Morten Nielsen, oqarpoq.
AAMMA ATUARUK Qimmit qimuttut pillugit suliaq: Politiit misissuinertik unitsikkaat
KNR-imit suliassanngortitsimaneq politiillu akissutigisimasaat takuneqarput.
Politiilli piffissami tamatumani qimmit pineqartut kalaallit qimmerineraat qimuttuunersut qularnaatsumik nalilersinnaasimanngilaat.
Taamaattumik uumasut nakorsaat isumasiorneqarpoq, uumasullu nakorsaata assit takusani aallaavigalugit qimmit kalaallit qimmerigaat qimuttut nalilerpai.
- 2017-imi piffissami tassani arlaannaataluunniit oqaatigisinnaanngilaa qimmit pineqartut kalaallit qimmerineraat qimuttut imaluunniit naamik. Tamannalu qularnaarneqartinnagu suliaq politiinit akuleruffigineqarsinnaanngilaq, Morten Nielsen oqarpoq.
AAMMA ATUARUK Pasilliutit nutaat: Qimmit allanertat piaraat Qeqertarsuarmi suli qimmerineqarput
Politiillu taamaammat 2017-imi suliassanngortitsineq misissuiffiginiarnagu aalajangerput.
Kisianni kimigiisertoqarneratigut - ilaatigut Kalaallit Nunaanni Qimussertartut Kattuffiannit - uumasut nakorsaat 2018-ip aasaanerani qimmit DNA-vanik misissuinissamut atugassamik qimminit tigusaqarpoq. DNA-milli misissuinerup inernera suli isertuunneqarpoq.
- DNA-millu misissuinerit, juulimi ukioq manna piareerneqartut, tamanna qularnaarpaat. Siusinnerusukkullu oqaatigisattut piffissami tassani ersarissivoq qimmit pineqartut 2017-imi ukiup affaani siullermi eqqunneqarsimasinnaanerat. Taamaattumik politiit suliami uani annerusumik suliaqaqqissinnaanngillat, Morten Nielsen oqarpoq.
AAMMA ATUARUK Qimmit qimuttut pillugit suliaq: Unioqqutitsilluni eqqussisoqarsimasinnaaneranut politiinut tunniussisoqarsimavoq
Kalaallit Nunaanni Politiit Namminersorlutik Oqartussanit Qeqertarsuarmut qimminik allanertanik eqqussisoqarsimaneranut pasilliutinit DNA-mik misissuinerit aasaq manna juulimi piareermata tunniussivigineqarput. Politiillu tunniussineq taanna misissuiffigeqqinniarnagu aamma unitsitsippaat.
- Suliat pisoqalisarnerannut tunngavoq. Politiit suliani akiliisitsinermik kinguneqartitsiviusussani unnerluussisussaatitaanngikkunik akiliisussanngortitsisimasussaatitaapput pinerluttoqarsimaneranit ukiut marluk qaangiutsinnagit, Morten Nielsen nassuiaavoq, nangillunilu:
- Matumanilu DNA-mik misissuinerit inerneri kiisalu politiinut tunniussineq qimminik eqqussinermit ukiut marluk qaangiutereersimanerani pimmat, taava suliaq politiinut anngunneqarnermini pisoqalereerpoq.
2017-mi politiinut suliassanngorteqqaartoq allaaserisami uani peqataarusunngilaq.
